Komisioni Qendror i Zgjedhjeve e ka përcjellë nga afër procesin e shtypjes së fletëvotimeve që do të përdoren për votim në zgjedhjet e parakohshme për Kuvendin e Republikës së Kosovës.

Shtypja e fletëvotimeve po realizohet nga shtypshkronja “Cetis”, në Celje të Sllovenisë.

Në njoftimin e KQZ’së theksohet se fletëvotimet përmbajnë elemente të avancuara të sigurisë, “të cilat garantojnë autenticitetin dhe mbrojtjen e tyre nga kopjimi apo falsifikimi, në përputhje me standardet e përcaktuara nga KQZ.”

Shtypja e fletëvotimeve është mbikëqyrur nga ekipe të anëtarëve të KQZ-së, të cilët kanë përcjellë nga afër të gjitha fazat e këtij procesi.

“Fillimisht, procesi i shtypjes së fletëvotimeve është mbikëqyrur nga anëtarët Ilir Gashi, Sami Hamiti, Muharrem Nitaj, Violeta Salihu, ndërsa më pas mbikëqyrja është vazhduar nga Kryesuesi i KQZ-së, Kreshnik Radoniqi dhe anëtari Alban Krasniqi. Gjatë ditëve në vijim, fazat përmbyllëse të këtij procesi do të mbikëqyren edhe nga anëtarët e tjerë të KQZ-së Stefan Filipović, Delvir Tairi dhe Shukrije Stolla. Pjesë e këtyre ekipeve janë edhe zyrtarë të Sekretariatit të KQZ-së”, theksohet në njoftim.

Sipas vendimit të KQZ-s, janë planifikuar të shtypen 1,778,300 fletëvotime, prej të cilave 1,605,000 për votimin në vendvotime të rregullta; 19,450 për votimin me kusht; 13,500 fletëvotime rezervë, 3,500 për votimin e personave me nevoja të veçanta; 108,000 për votimin me postë; dhe 28,850 për votimin në përfaqësi diplomatike.

Vlera e parashikuar për këtë kontratë ka qenë 284 mijë e 506 euro, teksa me procedurë të negociuar pa publikim të njoftimit për kontratë është dhënë për 342 mijë euro.