Deputetja e Nisma Socialdemokrate, Arbëreshë Krasniqi ka reaguar pas prezantimit që ia bëri kryetarja e Kuvendit të Kosovës, Vjosa Osmani në dhënien e fjalës gjatë seancës së sotme pasi nuk ia përmendi emrin e partisë së saj.

Krasniqi tha se edhe pse Nisma Socialdemokrate ka mbetur pa Grup Parlamentar, ajo i përket kësaj partie, emrin e së cilës kërkoi nga Osmani t’ia thoshte.

Mirëpo reagimi i menjëhershëm ishte nga Osmani e cila tha se nuk është çështje e deputetes për ta vlerësuar këtë, pasi siç tha ajo ekzistojnë disa rregulla në Kuvendin e Kosovës.

“Nga grupi parlamentar…Faktikisht një deputete pa grup e kemi, Arbëreshë Krasniqi. Nuk është çështje për ty ajo punë. Ekzistojnë disa rregulla në këtë kuvend, nuk keni grup Grupi Parlamentar zonjë…”, ka thënë Osmani, transmeton Telegrafi.

Por Krasniqi ia ktheu duke i thënë se mos të ketë komplekse dhe stres, dhe se mund t’ia përmend emrin e partisë nga e cila vjen ajo.

“Nëse po të pengon emri Nisma Socialdemokrate ke mundur të thuash emër dhe mbiemër. Kryetare pa kompleks, pa stres. Nuk e kemi ne atë problem. Na jemi parti socialdemokrate, është shumë e pranueshme me qenë unë si deputete pa grup, ama jo pa parti politike. Çështja e grupit është e jona e jo e juaja. Megjithatë faleminderit”, ka thënë Krasniqi.

Ndërsa Osmani i tha se komplekse kanë ata, pasi nuk po munden t’i bëjnë gjashtë deputetë për formimin e Grupit Parlamentar.