Komisioni për Ekonomi, Ndërmarrësi dhe Tregti ka shqyrtuar Raportin vjetor të Autoritetit Rregullativ të Komunikimeve Elektronike dhe Postare (ARKEP).

Naim Rahimi, kryetar i Bordit të ARKEP-it, ka deklaruar se kodi +383 i takon territorit të Kosovës.

Ai ka thënë se nga informatat që kanë deri tash nuk e kanë të identifikuar asnjë operator ilegal që ofron shërbime në vend. “Kodi 383 ka qenë i arritur në marrëveshjen e 2016, por i takon territorit të Kosovës pavarësisht që nuk shënon aty Republika. Në bazë të informatave nuk kemi të identifikuar operator ilegal që ofron shërbime në Kosovë”, ka thënë Rahimi.

Kurse, deputeti i VV-së Armend Muja ka pyetur se Kodi prej +383 në pronësi të kujt është. “A mundeni me na sqaruar se në pronësi të kujt është kodi +383, ku është titullar”, pyeti Muja.

Rrezarta Duraku-Rizaj nga ARKEP-i, ka thënë se duhet të trajtohet me seriozitet Ligji për Sigurinë Kibernetike, sepse vetëm atëherë mund t’i kenë të qarta kompetencat që i’u takojnë. “Ne nuk kemi pasur Ligj për Sigurinë Kibernetike, ne ku i marrim informatat e i njoftojmë operatorët e rrjetit dhe po presim që kur të miratohet Ligji mi pas më të qarta kompetencat tona dhe është që të trajtohet me seriozitet. Plani i numeracionit e kemi ndërruar disa herë dhe herën e parafundit e kemi bërë me një ekspert prej Belgjikës. Padi të reja ne nuk kemi pranuar dhe nëse është ngritur ndonjë deri me tani nuk ka ardhur shumica e lëndëve kanë kaluar në shkallën e dytë dhe të cilat i ka fituar ARKEP”, ka thënë ajo./ EO