Ismet Sylejmani

Ish-anëtari i LPK-së, ish-ushtari i UÇK-së, UÇPMB-së dhe ish-ushtari i Ushtrisë Çlirimtare Kombëtare, Naim Hasani nga Gjilani, ishte ndër ata veprimtarë dhe luftëtarë të devotshëm që në periudhat më të vështira të luftërave çlirimtare shqiptare nuk kursyen asgjë për nevojat e frontit dhe të luftëtarëve të lirisë!

Në vitin 2001, në kohën kur Brigada “113 Ismet Jashari Kumanova” e Ushtrisë Çlirimtare Kombëtare zhvillonte luftime të vazhdueshme dhe kishte nevojë të madhe për furnizim, bartje armatimi dhe sigurim të mjeteve logjistike, Naim Hasani, me veturën e tij të tipit Lada Karavan, ishte angazhuar në detyra të ndryshme të furnizimit dhe të bartjes së materialeve për nevojat e luftës!

Për shkak të terrenit të vështirë malor, lëvizjeve të kufizuara dhe rrezikut të madh nga forcat armike, shpeshherë duheshin gjetur mënyra të pazakonta dhe mjete alternative për transportimin e armatimit dhe të furnizimeve drejt vijave të frontit të luftës!

Pikërisht për këtë arsye, Naim Hasani kishte shkuar në fshatin Uglar dhe kishte blerë një gomar, i cili do të shërbente për bartjen e armatimit dhe të furnizimeve në terrenet ku automjetet nuk mund të depërtonin lehtë!

I shoqëruar nga një bashkëluftëtar, ai ishte nisur drejt vijës kufitare Kosovë-Maqedoni, me qëllim që gomarin ta dërgonin në zonat ku vepronin njësitet furnizuese të Ushtrisë Çlirimtare Kombëtare!

Gjatë rrugës, pasi kishin arritur në dalje të fshatit Zhegër, ata ishin ndaluar në një Check Point të US ARMY, i vendosur në kuadër të misionit të KFOR-it, për të kontrolluar dhe siguruar atë pjesë të zonës kufitare!

Ushtarët amerikanë, të cilët kryenin kontrolle të vazhdueshme të automjeteve dhe lëvizjeve në atë periudhë të ndjeshme, fillimisht iu afruan veturës me seriozitet dhe kujdes ushtarak!

Por sapo panë se çfarë ndodhej brenda veturës Lada Karavan, atmosfera ndryshoi krejtësisht!

Brenda veturës ndodhej gomari, i lidhur në të katër këmbët dhe i shtrirë, ndërsa kokën ia kishin nxjerrë përmes dritares që të mos ngulfatej gjatë udhëtimit!

Pamja ishte aq e pazakontë dhe aq befasuese, saqë ushtarët amerikanë mbetën të habitur dhe menjëherë shpërthyen në të qeshura!

Në mesin e tensioneve të kohës, kontrolleve ushtarake, lëvizjeve të armatosura dhe atmosferës së pasluftës, ajo skenë ishte diçka krejt ndryshe nga ajo që ishin mësuar të shihnin ushtarët e US ARMY!

Disa prej tyre filluan të komunikonin me humor me luftëtarët shqiptarë, ndërsa të tjerë nxorën aparatet fotografike dhe bënë fotografi nga ajo pamje e rrallë dhe e pazakontë, duke e konsideruar si një ndër momentet më interesante dhe më njerëzore që kishin përjetuar deri atëherë gjatë misionit të tyre në Kosovë dhe në zonën kufitare me Maqedoninë ku zhvilloheshin luftime!

Pas kontrollit të zakonshëm dhe pas atmosferës së krijuar me buzëqeshje, batuta dhe komunikim miqësor, ushtarët e US ARMY i kanë liruar dhe i kanë lënë të lirë të vazhdonin rrugën drejt destinacionit të tyre!

Kështu, furnizuesit e njohur të fronteve të luftës së Ushtrisë Çlirimtare Kombëtare vazhduan rrugën me gomarin që do të shërbente për bartjen e armatimit dhe të furnizimeve në zonat më të vështira të luftës!

Kjo ngjarje mbetet një kujtim i veçantë dhe një dëshmi e kohës së luftës, kur për nevojat e frontit të lirisë përdoreshin të gjitha mjetet dhe mënyrat e mundshme!

Kjo skenë tregon sakrificën, zgjuarsinë, përkushtimin dhe gatishmërinë e luftëtarëve shqiptarë, të cilët edhe në rrethana të jashtëzakonshme dhe në kushte të vështira, gjenin mënyra për ta mbajtur gjallë furnizimin e frontit!

Por mbi të gjitha, kjo histori mbetet edhe një moment i jashtëzakonshëm, ku në mes të luftës, tensionit dhe sakrificës, një skenë e pazakontë arriti të sillte buzëqeshje, humor dhe kujtime të paharrueshme mes ushtarëve amerikanë dhe luftëtarëve shqiptarë!

Prishtinë, 8 Maj 2026!