Kurti dhe Vitia është dashur të ofrojnë dorëheqje në Kuvend
Anëtari i Këshillit të Përgjithshëm i Lidhjes Demokratike të Kosovës (LDK), Haki Demolli, ka kritikuar qeverinë Kurti për menaxhim jo të duhur të pandemisë.
Në një intervistë dhënë gazetës “Epoka e re”, ai ka thënë se për shkak të numrit të madh të vdekjeve nga koronavirusi, kryeministri Albin Kurti dhe ministri i Shëndetësisë, Arben Vitia, është dashur të ofrojnë dorëheqje në Kuvendin e Kosovës.
“Nën menaxhimin e kësaj qeverie popullata e Kosovës ka përqindjen më të vogël të të vaksinuarve, madje edhe në krahasim me vendet e regjionit, siç janë Mali i Zi, Shqipëria, Maqedonia e Veriut, Serbia, Bosnja dhe Hercegovina etj. Gjatë periudhës maj-korrik 2021, kur në Kosovë si pasojë e ardhjes së njerëzve tanë nga diaspora, thuaja se u dyfishua popullata, kjo qeveri nuk ka ndërmarrë asnjë masë kundër Covidit, sepse nuk kishte bërë asnjë studim, analizë, hulumtim apo planifikim, duke vepruar si një diletante e vërtetë, thuaja se pandemia kishte pushuar së ekzistuari dhe pa pasur fare idenë se në fund të gushtit popullata që qeveriset prej saj do të goditet nga vala fatale dhe e furishme e variantit “Delta” të virusit Covid-19. Në shënjestër të virusit Covid (versionit “Delta”) kryesisht ishin personat e pavaksinuar, konkretisht evidencat kanë treguar se 93 për qind e të infektuarve dhe 99 për qind e të vdekurve ishin nga radhët e personave të pavaksinuar”, ka thënë Demolli.
Sipas tij, Qeveria është dashur të iu kërkoj falje familjeve të viktimave.
“Pasur parasysh të gjitha faktet e larttheksuara, besoj se historia do ta gjykojë këtë qeveri dhe do ta shpallë fajtoren kryesore për numrin kaq të madh të kosovarëve të vdekur nga Covidi-19. Sikurse vetëm pak të ndanin dhembjen me familjet e të vdekurve dhe shqetësimet e popullatës në përgjithësi, si dhe të ishin koshientë për pasojat kaq të rënda, tanimë kryeministri dhe ministri i saj i Shëndetësisë është dashur t’i ofronin dorëheqje Kuvendit të Kosovës. Në mos jodorëheqje, atëherë të paktën kryeministri dhe ministri i Shëndetësisë është dashur t’i kërkonin publikisht një falje të sinqertë të gjitha familjeve të të vdekurve nga Covidi-19”, është shprehur Demolli.
