Lideri i Lëvizjes Vetëvendosje, Albin Kurti, ka mbajtur një prezantim para 120 studentëve ndërkombëtarë nga Universiteti i Vjenës dhe ai i Venedikut, të cilët ishin të shoqëruar nga profesoresha Marijana Gradits.

Para studentëve, Kurti ka folur për situatën aktuale politike në vend, duke sqaruar rëndësinë e zgjedhjeve të 6 tetorit, arsyet e vonesës për formimin e institucioneve të reja dhe përpjekjet që po bëhen për formimin e tyre.

Ai ka paraqitur para studentëve programin zhvillimor te Lëvizjes Vetëvendosje që në qendër ka krijimin e vendeve të reja të punës dhe shtetndërtimin demokratik ku ka sundim të ligjit.

“Prioritet i qeverisë së re se do të jetë forcimin i shtetit dhe zvogëlimi i pushtetit”, ka thënë Kueti në fjalën e tij.

Pas prezantimit të shkurtër, studentët kanë parashtruar pyetjet që zgjeruan diskutimin mbi pikat programore të Lëvizjes Vetëvendosje që lidhen me ekonominë dhe investimet, drejtësinë dhe procesin e vetingut si dhe edukimin dhe sistemin dual të arsimit.

Studentët mes tjerash janë interesuar edhe për qëndrimet e Lëvizjes Vetëvendosje për çështje të caktuara ndër vite, për hapat konkret të kësaj lëvizje si udhëheqëse e qeverisë së ardhshme, si dhe për marrëdhëniet dhe politikat që bashkojnë komunitetet e ndryshme në Kosovë.

Studentët kanë falënderuar kryetarin Kurti për prezantimin e bërë para tyre dhe përgjigjet në pyetjet dhe çështjet e ngritura nga ta. Edhe kryetari Kurti ka falënderuar ata për ftesën e tyre për pjesëmarrje në këtë diskutim dhe për interesimin e treguar.

/Epoka e re/