Kurti status në ora 6:30 të mëngjesit: Votojeni LVV-në, ky është vetëm fillimi!
Kryeministri i Republikës, Albin Kurti me mëngjes, në ora 6:33, ka bërë thirrjen e fundit që të votohet Lëvizja “Vetëvendosje”.
Ai ka lavdëruar qeverisjen e tij, duke thënë se “për vetëm 6 muaj qeverisje po shënojmë rritjen më të lartë ekonomike që vendi ka pasur ndonjëherë”.
Sipas tij, kurrë më parë një Qeveri nuk ka bërë kaq shumë në vetëm 6 muajt e parë.
“Kurrë më parë nuk është ndjerë kaq shumë dora e mirë e shtetit tonë. Ky është vetëm fillimi”, ka shkruar Kurti në llogarinë e vet në “Facebook”.
Postimi i plotë i tij:
Të dashur qytetarë,
Duke ju falenderuar përzemërsisht për mikpritjen e jashtëzakonshme gjithandej komunave, fshtarave e lagjeve të Kosovës dhe diskutimeve të pafundme ju ftoj edhe një herë të votoni Lëvizjen VETËVENDOSJE! me numrin 144 dhe kandidatët e saj.
Bashkë jemi angazhuar, bashkë do të votojmë, bashkë do të fitojmë dhe bashkë qeverisim!
Shëndeti publik, financiar e social që erdhi nga ndryshimet demokratike me zgjedhjet paralamentare të 14 shkurtit 2021 duhet plotësuar e shtuar me zgjedhjet komunale të 17 tetorit 2021.
Për vetëm 6 muaj qeverisje po shënojmë rritjen më të lartë ekonomike që vendi ka pasur ndonjëherë. Rritja për 6 mujorin e parë të vitit është 10.4%, dhe kjo trajektore parashihet të mbahet deri në fund të vitit, për të përmbyllur vitin me rritje ekonomike dyshifrore.
Kemi rritje të qarkullimit të bizneseve për 36% krahasuar me vitin e kaluar, dhe 21% krahasuar me vitin 2019. Rritja e eksportit është edhe më impresive: vetëm këtë vit eksportet janë rritur mbi 60%.
Kemi shënuar po ashtu edhe rritjen më të madhe të të hyrave buxhetore që ka qenë ndonjëherë – plot 35% krahasuar me vitin paraprak.
Por nuk janë vetëm të hyrat që po performojnë më mirë.
Kemi vënë rregull e disiplinë në financat publike dhe tani ka më shumë buxhet që shkon te qytetari, e jo në tenderët e hajnisë.
Nga kursimet që kemi bërë dhe nga menaxhimi më i mirë i buxhetit, ka qenë e mundur që:
– Të sigurojmë vaksinimin rapid, që na vendos në top 10 vendet me vaksinimin më të shpejtë në botë;
– Të ndajmë mbi 30 milionë euro buxhet shtesë për menaxhimin e pandemisë;
– Të lirojmë nga pagesa e semestrit të gjithë studentët e universiteteve publike;
– Të sigurojmë një mijë bursa për studentë e 2 mijë kuponë për kurse në TI për nxënës maturantë;
– Të mbështesim krijimin e 9 mijë vendeve të reja të punës përmes Pakos së Ringjalljes Ekonomike në vetëm 3 muajt e fundit, dhe lajmi i mirë është se gjysma e tyre janë gra;
– Kemi ndarë buxhetin më të madh që ka pasur ushtria ndonjëherë dhe po e pajisim me armatim modern. Brenda këtij mandati do të arrijmë në standardin e NATO-s prej 2% të GDP-së buxhet për ushtrinë;
– Kemi rritur buxhetin për subvencione dhe do të mbyllim vitin me nivelin më të lartë të mbështetjes për bujqit;
– Kemi krijuar fond për blerjen e veprave të artit;
– Kemi rritur mbështetjen direkte për artin e pavarur dhe sportin me 5 milionë euro;
– Kemi filluar mbështetjen për të gjitha lehonat, me pagë minimale;
– Kemi filluar pagesën e shtesave për fëmijë;
– Jemi siguruar që asnjë pension të mos jetë nën 100 euro;
– Kemi mbështetur familjet në asistencë sociale me 30% më shumë ndihmë mbi atë që marrin zakonisht;
– Kemi mbështetur 17 kuzhina popullore me një milion euro;
– Kemi mbështetur likuiditetin familjar me deri në 300 euro për familje;
– Kemi mbështetur familjet që kanë humbur familjarin nga COVID-19.
Këto janë vetëm disa nga punët e mira, në 6 mujorin e parë të Qeverisë sonë, që janë mundësuar nga menaxhimi i mirë e mirë qeverisja.
Edhe shumë punë tjera të mira na presin ditëve e muajve në vijim.
Kurrë më parë një Qeveri nuk ka bërë kaq shumë në vetëm 6 muajt e parë. Kurrë më parë nuk është ndjerë kaq shumë dora e mirë e shtetit tonë.