Kurti: Do të jem kryetar i të gjithëve

23 janar 13:27

Pas marrjes së detyrës, kryetari i Lëvizjes Vetëvendosje (LV), Albin Kurti, është zotuar do të jetë kryetar i të gjithëve.

Ai ka thënë se është nder dhe përgjegjësi që të jetë në krye të Vetëvendosjes.

“Para një ore, Komisioni Zgjedhor i Përgjithshëm më ka shpallur zyrtarisht kryetar të ri të Lëvizjes Vetëvendosje. Gjatë 24 orëve pas shpalljes së rezultateve nuk ka pasur letërankesa për procesin zgjedhor të së dielës, në të cilin u votua sipas parimit një anëtar-një votë. Unë i falënderoj të gjithë votuesit, por edhe anëtarësinë e gjerë të lëvizjes sonë. Do të jem kryetar i të gjithëve, sepse do t’iu shërbej të gjithëve, vullnetit e interesit të përgjithshëm. Është nder dhe përgjegjësi për mua që të jem kryetar i Lëvizjes Vetëvendosje. Do të jemi bashkë në organizim dhe bashkë në drejtim”, ka deklaruar Kurti.

Ai është zotuar se do t’i përmbahet programit dhe statutit të Lëvizjes Vetëvendosje, alternativës qeverisëse dhe rregulloreve të funksionimit.

“Do të punoj e angazhohem me dijen e me mendjen, me vullnetin dhe dashurinë që kam për Lëvizjen dhe për Kosovën, sepse kështu kam fituar besimin tuaj dhe për shkak se jam i bindur se jemi më të mirët dhe më të drejtët nga të gjitha subjektet politike në Kosovë (dhe jo vetëm)”, është shprehur Kurti, duke shtuar se qytetarët presin shumë nga Lëvizja Vetëvendosje.

“Në këtë muajin janar të vitit 2018, janë bërë një shekull, pra saktësisht 100 vjet, prej se Presidenti amerikan Woodrow Wilson pat shpalosur programin e tij 14 pikësh me të cilin elaboronte të drejtën për vetëvendosje. Në Konferencën e Paqes në Versaj, pas mbarimit të Luftës së Parë Botërore, pikërisht përmes vetëvendosjes u pat shpëtuar Shqipëria nga copëtimi. Lëvizja jonë që mban emrin e këtij koncepti liridashës për popujt, në vitin që lamë pas, u bë subjekti i parë politik në vend dhe grupi më i madh parlamentar në Kuvend. Qytetarët e Kosovës kanë shumë halle dhe presin shumë prej nesh. Ne duhet të jemi e do të jemi në nivel të detyrës për qytetarët, si në komunat ku qeverisim ashtu edhe në ato ku jemi në opozitë, si në nivelin lokal, po ashtu edhe në atë qendror, ku ndërrimi i qeverisë dhe qeverisjes, është dëshirë e shumicës së qytetarëve”, ka theksuar Kurti.

Ai ka bërë me dije se platforma që ka prezantuar nuk hyn në fuqi automatikisht, pasi që sipas tij vërejtjet dhe sugjerimet do të trajtohen në forumet e lëvizjes.

“Kam marr vërejtje dhe sugjerime të ndryshme nga anëtarët dhe ato duhet të trajtohen hapur dhe thellë në forumet tona. Demokraci do të thotë që cilido mund ta ketë fjalën i pari por asnjëri nuk mund ta ketë atë i fundit. Pas mendimeve e opinioneve, vijnë diskutimet e përballjet, e pas diskutimeve e përballjeve vijnë vendimet me shumicën siç e parasheh atë statuti dhe rregulloret tona”, ka deklaruar Kurti.

 

 

 

 

 

Fjalët Kyçe:

Lajme të sponsorizuara

Të fundit
Ministria Mjedisit dhe Planifikimit Hapësinor (MMPH) i ka borxh komunës…