Në “The Arena” të Orlandos u zhvillua një nga sfidat më spektakolare në NBA, ku përballë u vunë Dallas Maverick dhe Portland Trail Blazers, ndërsa në fund “buzëqeshën” këta të fundit që arritën të fitojnë me shifrat 131-134.

Damian Lillard ishte fantastik në këtë sfidë, pasi arriti të shënojë plot 61 pikë, ose 45.5 % të totalit të pikëve të shënuar nga Trail Blazers, ndërsa gjithashtu ia doli të rikuperojë 5 topa dhe të japë 5 asistime, duke kompletuar një mbrëmje magjike. Portland mori kontrollin e lojës që në fraksionin e parë, të cilin e fitoi me 7 pikë diferencë, ndërsa reagimi i Dallas në pjesën e tretë të ndeshjes vetëm sa rihapi takimin, pasi nuk ndryshoi dot fatin e tij.

Kjo ishte fitorja e dytë radhazi për Portland Trail Blazers, që ruan pozitat në zonën “play-off” në renditjes në Konferencën e Perëndimit, ndërsa Dallas Maverick pëson humbjen e dytë në 5 sfidat e fundit të zhvilluara. Po në të njëjtin parket, Sacramento Kings triumfoi me shifrat 112-106 përballë New Orleans Pelicans. Të udhëhequr nga Harrison Barnes, që shënoi 25 pikë, rikuperoi 8 topa dhe dha dy asistime, Kings ndalën serinë prej dy humbjeve radhazi dhe iu larguan disi fundit të tabelës së renditjes.

Në Konferencën e Lindjes kryesuesit e Milwaukee Bucks vinin pas dy humbjeve radhazi, që gjithsesi nuk ua rrezikonin vendin e parë, por ia dolën të reagojnë dhe të fitojnë me shifrat 113-116 përballë Washington Wizards. Brook Lopez dhe Sterling Brown ishin protagonistët e suksesit të Milwaukee Bucks, që dominoi në tre fraksionet e para të lojës dhe lëshoi disi në pjesën e fundit, por pa vënë për asnjë moment në diskutim fitoren përballë Wizards. /SS/