Sërgjan Millosavleviq, nga partia më e madhe e serbëve në Kosovë, Lista Serbe, u ka thënë qytetarëve të mbledhur në Zveçan se kërkesat e komunitetit serb në këtë zonë, nuk kanë ndryshuar.

Ai ka rikujtuar se kërkesat lidhen me tërheqjen e njësisë speciale të Policisë së Kosovës nga komunat në veri, si dhe me moshyrjen e kryetarëve shqiptarë në ndërtesat e komunave atje.

“Ne u qëndrojmë këtyre kërkesave”, si kusht për ndaljen e protestave, ka thënë Millosavleviq, ish-kryetar i Kuvendit Komunal të Zveçanit.

Millosavleviq, po ashtu, ka thënë se komuniteti serb kërkon lirimin e dy qytetarëve serbë, Radosh Petroviq dhe Dushan Obrenoviq, të arrestuar gjatë dhunës së një dite më herët.

“Nëse nuk lirohen, le të mblidhemi në të gjitha komunat në numër edhe më të madh se dje dhe, në mënyrë paqësore, ta shprehim pakënaqësinë tonë për situatën”, ka thënë Millosavleviq.