Ministri i Zhvillimit Ekonomik, Valdrin Lluka, i shoqëruar nga deputetja Sala Berisha-Shala dhe kryetari i Bordit të “Trepçës”, Ardian Syla po qëndrojnë për një vizitë treditore në Toronto të Kanadasë për të marrë pjesë në konferencën vjetore të minierave dhe mineraleve, PDAC.

Kjo konferencë bashkon politikën, organizatat dhe bizneset me qëllim të tërheqjes së investimeve në këtë fushë.

Në ditën e parë të kësaj vizite, ministri Lluka së bashku me delegacionin kosovar ka takuar kryetarin e Odës Ekonomike të Ontarios, Rocco Rossi, të cilin e ka njoftuar nga afër për të gjitha ndryshimet ligjore që kanë ndodhur gjatë vitit 2018, duke përfshirë edhe statutin e “Trepçës”.

Oda Ekonomike e Ontarios do të ndihmojë me promovimin e projekteve minerare në Kosovë tek kompanitë kanadeze.

Ngjarja më e rëndësishme e ditës ishte samiti ndër ministror, organizuar nën patronatin e ministrit të Burimeve Natyrore të Kanadasë, Amarjeet Sohi, ku mbi 30 ministra dhe liderë të fushës së energjisë dhe minierave morën pjesë për të diskutuar rreth politikave zhvillimore të këtij sektori, duke biseduar për trendët e sektorit minerar që parashihet të ketë një zhvillim jashtëzakonisht të madh, duke vlerësuar që panelet solare, turbinat me erë, bateritë për deponim të energjisë, makinat elektrike dhe elektrifikimi i ekonomisë në përgjithësi përdorin minerale të ndryshme që pritet të rrisin eksploatimin për mbi 1000%.

Gjithashtu u shkëmbyen praktikat më të mira në zhvillimin e sektorit minerar dhe njëkohësisht e mbyllëm tregun e bursës se minierave të Torontos.

Ministri Lluka në ceremoninë e hapjes së PDAC 2019 ka zhvilluar një takim edhe me presidentin e saj, Glenn Mullan, të cilin e ka njoftuar për potencialin që ofron Kosova në sektorin minerar.

Ndërsa sot, ministri Lluka do të mbajë një prezantim para investitorëve potencial për mundësitë për investime të cilat i ofron Kosova në sektorin minerar, për të vazhduar agjendën me zevendësministrin e Energjisë të Republikës së Turqisë, Mithat Cansiz.

Gjithashtu Lluka do të takojë edhe disa nga kompanitë kanadeze siç janë Avrupa edhe Trevali të cilat tashmë vetëm se kanë filluar investimet në sektorin minerar në vendin tonë.

Në këtë drejtim, Lluka poashtu do të takojë edhe rrjetin e bizneseve shqiptare në Kanada.

/Epoka e re/