Maliqi: Të hapet edhe një Gjykatë e Hagës për krimet e padënuara të Serbisë
Analisti Shkëlzen Maliqi ka kërkuar që Serbia të detyrohet të zbulojë 16 varrezat masive të krimeve të luftës që në një emision televiziv i përmendin zyrtarët e kabinetit të ish-kryeministrit serb Zoran Gjingjiq.
Ai po ashtu ka kërkuar që të hapet edhe një Gjykate e Hagës për krimet makabre të padënuara të Serbisë zyrtare.
“Kryediplomati dhe ish-kryeministri serb Ivica Daçiq të ndiqet penalisht për obstruksion të drejtësisë në zbulimin e krimeve masive te luftës. Prokuroria e Kosovës të ngritë padinë! Të iniciohet Peticioni në Kosovë dhe Peticion ndërkombëtar ku kërkohet përgjegjësia dhe ndjekja penale e të gjithë zyrtareve serbë për aferën makabre të varrezave masive të fshehura me vite”, ka shkruar Maliqi në llogarinë e vet në “Facebook”.
Ai ka shkruar se duhet të hapet edhe një Gjykatë e Hagës për krimet makabre të padënuara të Serbisë.
“E kemi ditur ketë edhe më herët, por tani kemi dëshmitë e dorës së parë që akuzojnë jo vetëm regjimin e Milosheviqit, por edhe të gjitha regjimet pasuese. Le të hapet edhe një Gjykate e Hagës për krimet makabre te padënuara të Serbisë zyrtare”, ka shkruar publicisti Maliqi.
(Q.R / Epoka e re)