Mbahet takimi i katërt Komisionit Ekzekutiv për Shëndetësi

27 tetor 11:26

Nën kryesimin e kryeministrit Albin Kurti është mbajtur mbrëmë takimi i katërt i Komisionit Ekzekutiv për Shëndetësi.

Gjatë këtij takimi janë evidentuar rezultatet e para të punës së Komisionit, si dhe të angazhimit të shtuar të anëtarëve të tij.

Kryeministri Kurti, në fjalën e tij hyrëse, theksoi dy udhëzimet administrative që janë miratuar që nga themelimi i Komisionit.

Udhëzimi i parë, për Licencimin e profesionistëve shëndetësorë të huaj, synon të lehtësojë ardhjen e profesionistëve shëndetësorë të mërgatës dhe të huaj, për të plotësuar ofrimin e shërbimeve që mungojnë ose rrezikojnë të mos ofrohen në institucionet publike shëndetësore. Ndërsa, udhëzimi i dytë, për thjeshtimin e procedurave për regjistrimin dhe importin e produkteve medicinale, që nuk kanë paralele të autorizuara në Republikën e Kosovës, do të sigurojë që barnat pa garanci të cilësisë nuk do të mund të futen në konkurrencë për tenderë të shpallur nga institucione publike shëndetësore.

Lidhur me udhëzimin e parë, u.d. ministrja e Shëndetësisë, Dafina Gexha-Bunjaku, foli për hapat e ndërmarrë për të siguruar ardhjen sa më të shpejtë të profesionistëve shëndetësorë nga jashtë vendit.

Duke folur për një prioritet tjetër të identifikuara nga Komisioni, zëvendësministri i Shëndetësisë, Arsim Berisha, theksoi masat e ndërmarra drejt përmirësimit të shërbimeve për qytetarët e Kosovës. Me këtë qëllim, gjatë javëve në vijim, Ministria e Shëndetësisë dhe Inspektorati Shëndetësor do të vazhdojnë bashkëpunimin e ngushtë, duke shtuar inspektimet në institucionet shëndetësore.

Gjatë takimit, Kryeministri Kurti theksoi se hapat e ndërmarrë deri tani, përbëjnë vetëm një pjesë në rrugëtimin drejt reformave të thella në sektorin e shëndetësisë. Ai po ashtu shfrytëzoi rastin për të falënderuar ish-ministrin, dr. Rifat Latifi, për shërbimin gjatë dhjetë muajve në krye të Ministrisë së Shëndetësisë, si dhe ushtruesen e detyrës së ministrit, Dafina Gexha-Bunjaku, për gatishmërinë e saj për të udhëhequr këtë dikaster të rëndësishëm.

Lajme të sponsorizuara

Të fundit
Kryeministri Albin Kurti së bashku me ministren e Arsimit, Shkencës,…