Aleanca për Ardhmërinë e Kosovës këmbëngul se nuk do të votojnë asnjë kandidat tjetër për president të vendit, përveç kryetarit Ramush Haradinaj.

Krerët e partive politike pritet që javën e ardhshme t’i nisin takimet për ta zgjidhur ngërçin institucional të krijuar nga dorëheqja e papritur e kreut të shtetit, Hashim Thaçi.

Nënkryetari i AAK-së, Ahmet Isufi, liston disa nga pikat e forta se pse ish-kryeministri Haradinaj e meriton karrigen e liderit.

Këtë e ka konfirmuar me tentimin për ndarjen e Kosovës që ishte shumë i përgjegjshëm në ato situata. Po ashtu, edhe rreth krijimit të ushtrisë, ligjit për Trepçën si pasuri e Kosovës dhe territor i Kosovës. Edhe raportet me ndërkombëtar i ka sqaruar drejtpërdrejtë ashtu siç burrështetas”, ka deklaruar Isufi.

Partitë opozitare, si Lëvizja Vetëvendosja apo PDK-ja, nuk i ka bindur kandidatura e Haradinajt, sikurse udhëheqësit e koalicionit qeverisës nga Lidhja Demokratike e Kosovës.

“Më shumë ka mosdakordim mes partnerëve politikë sesa ka të bëjë me presidentin”.

Nënkryetari Isufi beson se për 14 deputetët e AAK-së nuk ka zgjidhje tjetër.

Ai pret që partitë të heqin dorë nga interesat e ngushta, ndryshe paralajmëron divorcin politik.

“Nëse nuk ka zgjidhje atëherë ka zgjedhje… është e palogjikshme të mendojmë ndryshe, sepse edhe në rrethana të caktuara, kur kemi thënë për rolin e kryeministër për shembull, kur na kanë thënë pse po ngulni këmbë se vota nuk është e mjaftueshme sa i përket nivelit të partisë. Por ne po konsiderojmë se njerëzit duhet të zgjedhën në vendin adekuat ku e meritojnë për shkak se funksionimi i tyre do të ishte më i mirë për shoqërinë”, ka deklaruar ai.

Që nga data 5 nëntor posti i të parit të shtetit në Kosovë po ushtrohet përkohësisht për një afat jo më të gjashtë se gjashtë muaj nga kryeparlamentarja Vjosa Osmani.

Me kushtetutë, procedurat për formalizimin e pasardhësit duhet të mbyllen brenda datës 5 prill 2021, ndryshe do të shpërndahet Kuvendi dhe vendi do të shkojë automatikisht në zgjedhje të reja.