Ministria e Arsimit fillon organizimin e mësimit online për nxënësit

17 mars 2020 | 15:28

Për shkak të situatës së krijuar si rezultat i pandemisë COVID-19, Ministria e Arsimit, Shkencës, Teknologjisë dhe Inovacionit (MAShTI) ka filluar menjëherë punën rreth organizimit të procesit të mësimit në distancë (mësimi online).

“Në këtë kuadër, kemi gjetur mbështetje të konsiderueshme nga shumë operatorë ekonomikë nga fusha e ICT-së, medieve dhe ofruesve të shërbimeve arsimore, të cilët kanë ofruar kapacitetet e tyre infrastrukturore dhe ekspertizën profesionale për ta mbështetur MAShTI-n në jetësimin e iniciativës për krijimin e platformës për mësimin online në Kosovë”, ka njoftuar MAShTI.

Platforma e mësimit në distancë (online), do të jetë në dispozicion për të gjithë nxënësit e institucioneve publike dhe atyre private, pa dallim.

MAShTI ka bërë me dije se është në kontakt të vazhdueshëm me transmetuesin publik, Radio Televizionin e Kosovës, i cili ka shprehur gatishmëri për të transmetuar mësimin online në kanalet e tyre.

Po ashtu, MAShTI është duke komunikuar me ofruesit e shërbimeve të internetit në mënyrë që edhe familjeve me fëmijë që nuk kanë qasje në internet t’iu ofrohet shërbimi online pa pagesë, në mënyrë që t’iu mundësohet pjesëmarrja në mësimin nga distanca.

Lidhur me shkollat private, të cilat veçse janë duke ofruar shërbimin e mësimit online për nxënësit e tyre, MAShTI sqaron se këto shkolla kanë të drejtë të ofrojnë shërbime edukative të digjitalizuara në mënyrë vetanake, gjithnjë duke pas parasysh se mësimi zhvillohet në përputhje me planprogramin mësimor të aprovuar nga MAShTI.

Lajme të sponsorizuara

Të fundit
Numri i të vdekurve nga koronavirusi në Spanjë është rritur…