Ministri i Mjedisit, Planifikimit Hapësinor dhe Infrastrukturës, Liburn Aliu, ka njoftuar të martën se kanë pezulluar pëlqimin mjedisor për ndërtimin e një inceneratori për trajtimin e mbeturinave në qytetin e Ferizajt.

Në një konferencë për medie, ai ka thënë se ministria që drejton në dhjetor të vitit të kaluar i kishte lëshuar pëlqimin mjedisor një kompanie për incenerator në Varosh të Ferizajt, që nënkupton djegien e rreth 100 mijë ton mbeturinave në vit.

Sipas tij, kjo është bërë pa i përfillur ligjet dhe pa konsultim me ekspertë të ambientit.

“Në maj befas na vjen një kompani dhe thotë kemi marrë pëlqim nga ju për trajtim termik të mbeturinave dhe po ashtu kemi marrë leje ndërtimore në Komunën e Ferizajt për të ndërtuar një gjenerator. Kam kuptuar që në dhjetorin e vitit që shkoi ka pasur të lëshuar pëlqim mjedisor për incenerator në Varosh të Ferizajt, që nënkupton djegien e rreth 100 mijë ton mbeturinave në vit”, ka deklaruar ministri Aliu para gazetarëve.

Ai ka thënë se duke njohur gjeografinë e vendit e di që është vështirë për të gjetur një lokacion të tillë në vendin tonë, i cili nuk ka për të pasur ndikim te qytetarët.

“Pas vizitës në terren dhe takimet me qytetarët, e kemi kuptuar se askush nga qytetarët nuk e ka ditur se aty planifikohet të ndërtohet një gjenerator. E kemi shqyrtuar edhe raportin e vlerësimit të ndikimit në mjedis. Aty thuhet se objekti është 3 mijë metra larg vendbanimeve gjë që ishte e pamundur pasi janë më pak se 700 metra”, ka thënë Aliu

Ai tutje ka theksuar se kanë nisur një proces të auditimit dhe janë bërë matjet gjeodezike, ku më pas kanë kuptuar se ky raport nuk ka të bëjë asgjë me realitetin. “Kemi marrë vendim që kjo të shkojë në auditim e aty më pas dalin edhe shkelje të tjera. Fatmirësisht përfundoi si rast deri tani me pezullimin e pëlqimit mjedisor”, është shprehur Aliu.

Ndërsa, zëvendësministri Avni Zogiani ka bërë të ditur se janë shkarkuar dy komisione lidhur me këtë rast.