Ministrja e Drejtësisë, Albulena Haxhiu, ka bërë të ditur se do t’i bashkohet protestës të thirrur për nesër ku kërkohet drejtësi për 18 vjeçaren e cila u dorëzua pa shenja jete nga dy persona në Spitalin e Ferizajt dhe më pas u larguan.

Njëri nga ta është arrestuar, ndërsa tjetri ndodhet ende në arrati.

Haxhiu në një postim në rrjetin social “Facebook”, ka shkruar se do t’i bashkohet protestës së neserme “Drejtësi për gratë e vrara” e cila do të mbahet pranë stacionit policor në Ferizaj, përcjell Demokracia.com.

Kujtojmë se Qendra Kosovare për Studime Gjinore ka thirrur një protestë për nesër në orën 12:00, pas vrasjes së 18-vjeçares në Ferizaj.

Postimi i plotë:

Unë do t’i bashkohem protestës së neserme “Drejtësi për gratë e vrara” e cila do të mbahet pranë stacionit policor në Ferizaj!

Angazhimi shoqëror dhe institucional është i domosdoshëm për ndryshimin e mentalitetit patriarkal dhe për veprime serioze kundër dhunës ndaj grave, dhunës në familje dhe dhunës në baza gjinore!