Në Baltik ka një mister të ri. Një vit pas sabotimit të Nord Stream.

Një tubacion gazi dhe një kabllo telekomunikacioni nënujor që lidh Finlandën dhe Estoninë u dëmtuan të dielën.

Dhe referuar presidentit finlandez Sauli Niinisto, “ka gjasa të jetë një aktivitet i jashtëm”.

Në një konferencë shtypi të thirrur të martën në lidhje me një “ndryshim shqetësues në situatën e sigurisë në Finlandë” , qeveria foli për një akt të qëllimshëm.

Këtë, duke lënë të kuptohet për mundësinë e sabotimit.

Sipas informacioneve të mbledhura nga tabloidi Iltalehti, dyshimet e autoriteteve dhe ushtrisë së Helsinkit, do të bien mbi Rusinë.

Presidenti Niinisto ka folur për këtë me Sekretarin e Përgjithshëm të NATO-s, Jens Stoltenberg, i cili garantoi mbështetje në hetimet e Aleancës Atlantike, në të cilën Helsinki ka qenë anëtar që nga prilli dhe Talini që nga viti 2004.

Në funksionim që nga dhjetori i vitit 2019, tubacioni Balticconnector kalon 77 kilometra nën Baltik midis Inkoo, Finlandë dhe Paldiski, Estoni, duke furnizuar gjithashtu Letoninë dhe Lituaninë.

Ai u mbyll të dielën në mëngjes si masë paraprake pas zbulimit të një rrjedhje gazi në Gjirin e Finlandës, ujërat e të cilit prekin edhe Rusinë dhe arrijnë në portin e Shën Petersburgut.

Presioni në tubacion ra me shpejtësi rreth orës 02:00 të mëngjesit dhe kjo sipas një zyrtari lokal “sugjeron se mund të mos jetë një rrjedhje e vogël”.

Sipas operatorit finlandez Gasgrid ka të ngjarë të duhen muaj për ta riparuar.

“Shkaku ende nuk është identifikuar, hetimi i përbashkët midis Finlandës dhe Estonisë po vazhdon”, ka thënë Presidenti Niinisto.

Policia finlandeze është vënë në punë dhe ende po verifikon përmasat e dëmit, përmasat e të cilit sugjerojnë një veprim të qëllimshëm që kërkon njohuri të specializuara.

“Një akt i tillë nuk mund të kryhet nga një person i zakonshëm”, ka shpjeguar inspektori Timo Kilpelainen.

Sakaq, Kryeministri Petteri Orpo e ka quajtur situatën shqetësuese, por furnizimi finlandez me energji elektrike mbetet i qëndrueshëm dhe dëmtimi i kabllos së telekomunikacionit nuk pati asnjë efekt në lidhjen e vendit.

“Është ende herët për të kuptuar se kush apo çfarë e shkaktoi dëmin”, ka theksuar kryeministri.

Ndërkohë, referuar zëdhënësit të Forcave të Mbrojtjes Finlandeze, asnjë kërcënim ushtarak ndaj vendit nuk është identifikuar.

Marrë nga “Corriere della Sera”, përshtatur për “Albanian Post”.