Qytetarë të shumtë, struktura udhëheqëse komunale dhe qendrore, por edhe mysafirë nga Maqedonia, Presheva dhe Shqipëria të mërkurën kanë bërë homazhe në nderim të jetës dhe veprës së Shaban Viçës-Bacit në 10-vjetorin e vdekjes së tij.

Kurora të freskëta me lule, pranë varrit të Bacit ka vendosur, kryetari i Ferizajt, Agim Aliu, deputeti i PDK-së, Elmi Reçica së bashku me drejtorin e urbanizimit Lulzim Aliun si dhe këshilltarin komunal Gëzim Haxhimusa, etj.

I vëllai i Shaban Viçës, Nazmiu, ka thënë se Baci përbën një figurë shumëdimensionale, i afërt dhe i dashur, kontributi i të cilit tashmë është i njohur për të gjithë.

Shaban Viça, kontributin atdhetar e patriotik e ka zhvilluar edhe në trojet tjera të shqiptarisë, në Kosovën Lindore, Maqedoni e Shqipëri. Shokët që kishin ardhur nga këto troje e kanë vlerësuar si një luftëtarë të paepur për çështjen kombëtare.

Synimi i Bacit ka qenë bashkim kombëtar. Këtë e kanë thënë familjarët dhe shokët e tij. Sipas tyre ai edhe ka punuar për sendërtimin e këtij misioni.

Ngushëllimi për familjarët e Bacit, janë shokët e tij të cilët për çdo vit e përkujtojnë. Familjarët këtë kontribut të tyre e vlerësojnë si lehtësim për ta.

Ndryshe, me rastin e 10-vjetorit të ndarjes nga jeta të Shaban Viçes, një akademi përkujtimore pritet të mbahet në orët e mbrëmjes në Prishtinë, me ç’rast do të shfaqet edhe një dokumentar kushtuar figurës së tij.

/Epoka e re/