Në Shtutgart të Gjermanisë, bashkëluftëtarë, bashkëveprimtarët, miq, shokë dhe familjarë të veteranit të tri luftërave çlirimtare, Agron Haradinajt, organizuan të shtunën tubim përkujtimor në njëvjetorin e kalimit të tij në përjetësi.

Tubimi u hap me jetëshkrimin për Agron Haradinajn, “Flakadan që u dogj e s’u shua”, ndërsa moderatori i kësaj mbrëmjeje, Xhelal Tetaj, ftoi nikoqirin, veprimtarin Gëzim Avdimetajn për një fjalë rasti.

Gëzim Avdimetaj, pasi i përshëndeti të pranishmit dhe falënderoi të pranishmit e shumtë për pjesëmarrje, kërkoi një minutë heshtje për të nderuar jetën dhe veprën e Agron Haradinaj.

Veprimtari i shquar Hasan Ukëhaxhaj foli për veprimtarinë e Agron Haradinajt dhe familjen e tij që ka dhënë kontribut të madh për çështjen kombëtare.

Ndërsa Imer Lladrovci në fjalën e tij, potencoi se Agron Haradinaj do të jetë frymëzues për brezat e ardhshëm që do të vinë se si duhet të punohet, të veprohet e të luftohet për lirinë e kombit të tij.

Pjesëmarrësit dhe te pranishmit i përshëndetën edhe bashkëluftëtarët e Agronit;

Gjenerali Kudusi Lame, nga Tirana, Kolonel Sokol Poga nga Durrësi, Kryetari i Deçanit, Bashkim Ramosaj, Komandant Shpëtimi – Mustafë Shaqiri, nga Lugina e Preshevës si dhe Uk Lushi nga Batalioni Atlantiku nga Nju Jorku,Avni Mataj,Bajram Mulaj.

Të gjithë folën me vlerësimin më të lartë për veprën, kontributin e heroizmin e Agron Haradinajt, nga mosha e rinisë së hershme, si ndër të burgosurit më të rinj në ish Jugosllavi, nga një familje e cila e tëra u persekutua pa ndalë, deri në çlirimin e vendit, si dhe me heroizmin si ushtar i tri luftërave dhe pjesëtar i tri ushtrive tona çlirimtare.

Po ashtu, u shfaq filmi dokumentar “Flamurtar i lirisë shqiptare” nga ATD Tv Pejë, që i kushtohej Agron Haradinajt dhe familjes së tij, duke nxitur emocione të forta tek të pranishmit.

Për Agronin dhe heronjtë, u kënduan këngë atdhetare nga Avdullah Bajrami, Lëndita Haxhiu Zeqiri dhe Valdet Idrizaj.

Ndërsa në fund të tubimit organizatorin dhe të pranishmit në emër të familjes i përshëndeti Gjeneral Nasim Haradinaj, me ç’rast theksoi se bashkatdhetarët asnjëherë nuk u ndan nga çështja kombëtare dhe përkujtimi për heronjtë, dëshmorët dhe martirët e kombit.