Komuna e Kamenicës, përkatësisht Qendra Kryesore e Mjekësisë Familjare (QKMF) ka nisur vaksinimin e personelit shëndetësor kundër Covid-19.

Me këtë rast, kryetari i Kamenicës, Qëndron Kastrati, ka falënderuar ekipin e vaksinimit dhe gjithë stafin shëndetësor për punën që kanë bërë gjatë ballafaqimit me pandeminë.

“Nis vaksinimi i personelit shëndetësor në Kamenicë. Bashkë me drejtoreshën e Shëndetësisë, Suna Zajmi-Krasniqi, sot vizituam Qendrën Kryesore të Mjekësisë Familjare, ku edhe nisi vaksinimi kundër virusit SARS-CoV-2. Uroj e shpresoj që sa më parë të sigurojmë doza tjera të vaksinës, sepse nevoja është e madhe. Faleminderit ekipit të vaksinimit dhe gjithë stafit shëndetësor për punën e jashtëzakonshme që kanë bërë gjatë ballafaqimit me pandeminë. Qofshi shëndosh”, ka thënë ai.

Ndërsa drejtoresha e Shëndetësisë dhe Mirëqenies Sociale, Suna Zajmi-Krasniqi, ka thënë se shpreson që sa më shpejt të vaksinohen edhe pjesa tjetër e stafit dhe qytetarët.

Ndryshe personi i parë i cili është vaksinuar ishte drejtori i QKMF-së, Besim Beqiraj, ndërsa kryetari Kastrati ishte vetëm prezent gjatë këtij procesi, duke u lënë hapësirë që të vaksinohen ata që më së shumti kanë nevojë.