Osmani: Është bërë përparim në lobim te shtetet mosnjohëse

08 dhjetor 11:03

Pasi Kosova ka zbuluar planet për të aplikuar për anëtarësim në Bashkim Evropian (BE) para fundit të vitit, presidentja Vjosa Osmani, ka thënë  se është duke u bërë përparim në lobimin te pesë vendet anëtare të BE-së që aktualisht nuk e njohin vendin.

Qiproja, Greqia, Spanja, Rumania dhe Sllovakia nuk e njohin pavarësinë e Kosovës nga Serbia, e shpallur në vitin 2008 pas një lufte brutale të viteve 1998-99, ku ishin vrarë 13 mijë njerëz dhe  ishin zhvendosur deri në 1.4 milion shqiptarë etnikë.

Që Kosovës t’i jepet statusi i kandidatit në BE dhe anëtarësimi, kërkohet miratimi unanim i 27 shteteve anëtare, të cilat mbeten të ndara për këtë çështje.

“Por ne duam t’i përdorim këto vite në dy fronte, njëra, për t’u siguruar që të shtyjmë përpara për reforma të rëndësishme në vendin tonë që do të na afronin me BE-në. Dhe së dyti, për të bindur të gjithë anëtarët e BE-së që të mbështesin anëtarësimin e Kosovës dhe të na japin statusin e kandidatit”, ka thënë presidentja Osmani në një intervistë për “Euractiv”.

Ajo ka shpjeguar se kanë zgjedhur që aplikimin ta bëjnë në dhjetor, gjatë presidencës çeke të Këshillit të BE-së, sepse Praga i ka dhënë shumë mbështetje Kosovës dhe rajonit dhe për shkak të shpresës që liberalizimi i vizave të finalizohet deri në fund të muajit.

Suedia, e cila është shumë më pak e interesuar për zgjerimin, merr kontrollin nga çekët më 1 janar.

Duke komentuar samitin e Ballkanit Perëndimor të mbajtur në Tiranë këtë javë, Osmani ka thënë se ajo pa një ndryshim në gjuhën e deklaratës së nënshkruar pasi ajo flet për “perspektivën e anëtarësimit në BE për të gjashtë anëtarët e Ballkanit Perëndimor”, dhe jo vetëm për “perspektivën evropiane” ose anëtarësim për pesë shtete.

Kjo pasqyron si statusin e mundshëm kandidat që mund t’i jepet Bosnjë-Hercegovinës javën e ardhshme, ashtu edhe synimet e Kosovës për të aplikuar.

E pyetur nëse ka ndonjë strategji apo qasje specifike që po përdoret me pesë mosnjohësit, ajo tha se po ndërmerret një qasje hap pas hapi dhe është bërë përparim.

Me disa, ka thënë Osmani, tashmë ka një nivel të lartë të bashkëpunimit ekonomik, njohjes së dokumenteve, turizmit, kulturës, që do të thotë se ajo që ka mbetur është njohja formale.

“Pra, ne do të vazhdojmë me këtë qasje edhe me mosnjohësit e tjerë, disa prej të cilëve kishin një qasje më të ngurtë ndaj Kosovës, por mendoj se po ia dalim, vetëm duhet të jemi të durueshëm”, ka thënë ajo.

Osmani ka thënë se është mirënjohëse ndaj atyre që janë partnerë dhe aleatë, por ka theksuar se BE-ja në tërësi duhet të kuptojë se mesazhet e paqarta nuk janë më të përshtatshme në kontekstin aktual gjeopolitik.

“Unë mendoj se kjo është një nga ato pikat e lakimit në histori ku Bashkimi Evropian duhet të kuptojë se mesazhet e përziera, mesazhet e paqarta, më nuk po kryejnë punë. Ata duhet të jenë të qartë ndaj Ballkanit Perëndimor, duke i mbështetur anëtarët e Ballkanit Perëndimor që kanë marrë një pozicion të qartë për Ukrainën, një pozicion të qartë kundër Rusisë”, ka thënë Osmani.

Lajme të sponsorizuara

Të fundit
Ish-futbollisti i njohur, Shefki Kuqi është i ftuar në emisionin…