Osmani, Sveçlës: Vetëvendosje t’i bashkohet LDK-së

27 gusht 2019 | 15:12

Lidhja Demokratike e Kosovës (LDK) dhe Lëvizja Vetëvendosje do të vazhdojnë ditëve të ardhshme diskutimet lidhur me mundësinë e arritjes së një koalicioni parazgjedhor.

Lutfi Haziri pas mbledhjes së Këshillit të Përgjithshëm, ka thënë se Vjosa Osmani në mënyrë unanime sot e ka marrë mbështetjen për kryeministre të Kosovës.

Sipas tij, askush më mirë se Osmani nuk mund të funksionalizojë demokracinë në Kosovë.

Ndërsa, kandidatja e LDK-së për kryeministre, Vjosa Osmani, teksa falënderuar të gjithë për mbështetjen, ka thënë se unanimisht Këshilli i Përgjithshëm i LDK-së ka vendosur që mos të hyjë në koalicion me PDK-në as para zgjedhjeve, por as pas mbajtjes së tyre më 6 tetor.

Duke qenë të vendosur që pozita e kryeministrit t’i takojë LDK-së, Osmani ka thënë se fokusi për një bashkëqeverisje është me Lëvizjen Vetëvendosje dhe se në ditët në vijim do të vazhdojnë diskutimet bashkërisht.

“Vetëvendosje duhet t’i bashkohet LDK-së në ndërtimin e një epoke të re të ndryshimeve të mëdha, të cilat do të jenë historike dhe që do e çkapin shtetin nga krimi dhe korrupsioni”, ka thënë Osmani.

Lidhur me deklarimet e ish-deputetit të Vetëvendosjes, Xhelal Sveçlës, i cili e ka quajtur tinëzare LDK-në, Vjosa Osmani, ka thënë se deklaratat e tilla tregojnë se kjo lëvizje nuk ka pasur bashkëpunim të sinqertë dhe shpreson se ato mendime të mos të jenë edhe të lidershipit të saj.

Lajme të sponsorizuara

Të fundit
Lulëzim ETEMAJ Romani “Nëna Shegë e pesë gocat”, i autorit…