Shkruan: Gentrit Kadrolli

Si rezultat i pandemisë Covid-19, pothuajse të gjithë ne kemi drejtuar sytë nga qeveritë e shteteve se cilat janë planet e tyre të rimëkëmbjes ekonomike pas pandemisë. Disa me plane më të mira kurse disa të tjera të lënë shumë për të dëshiruar. Por, në kohën kur shumë biznese në mbarë botën si rezultat i virusit Covid-19 po përballen me një situatë tepër të vështirë, të panjohur dhe të paparë deri më tani, çuditërisht, disa bizneseve në botë por jo në vendin tonë, në këtë kohë të pandemisë po ju ndodh mrekullia! Po ju ndodh ajo që as nuk ishte menduar nga këto biznese por edhe nga njerëzit në përgjithësi. Pyetja që shtrohet se kush po e bënë këtë mrekulli në këtë kohë pa kohë për këto biznese? Janë pikërisht klientët e tyre besnikë ata që po ua kthejnë me të njëjtën mënyrë këtyre bizneseve, ndoshta edhe më mirë, mundin, kujdesin dhe përkushtimin. Rreth pesëqind vite më parë, atëherë kur kishte filluar të bëhej prodhimi i pasqyrave, njerëzit respektivisht konsumatorët tentonin që në çfarëdo forme vetëm të kishin një të tillë, ndoshta edhe me një çmim më të lartë, vetëm që ta kenë atë pasqyrë sepse ndiheshin jashtëzakonisht mirë. Ishte e papërshkrueshme ndjenja kur e shihnin veten e tyre në të. E njëjta gjë sot vlen edhe për këta klientë ku  bizneset nga të cilat shërbehen kanë arritur t’i bëjnë klientët ta shohin veten e tyre në to.

Janë veçanërisht tri biznese të cilave edhe nëse nuk ua përmend emrin nuk ka aq rëndësi, sa ka rëndësi ajo me çka ato po përballen, të cilën e quajnë thjesht – “mrekullia e kthimit të besimit”.

a)  Në fushën e parukerisë, si rezultat i vendimeve për ndalimin përkohësisht të ushtrimit të aktivitetit nga shumë shtete, një biznes në USA që i përket këtij lloji te kategorisë, papritur ka filluar të pranoj të hyra në xhirollogarinë e tij. Për pronarin e këtij biznesi ka qenë diçka e papërshkrueshme se si klientët transferojnë shuma solide por shumë të vlefshme për biznesin. Këta klientë bëjnë çmos vetëm që biznesi ku ata e shohin veten e tyre në të, ta përballojë më lehtë këtë situatë.

b)  Në fushën e amvisërisë, si rezultat i vështirësive të shumta, e më kryesorja, rëniet e të hyrave dhe shkurtim të stafit aktiv, një biznes në Austri po ndihmohet në mënyrë vullnetare pikërisht nga klientët besnikë të cilët e shohin prapë vetveten në këtë biznes. Puna e tyre vullnetare po bëhet në rolin e agjentëve të shitjes, ‘merchandising’ dhe role tjera, vetëm e vetëm që biznesi në të cilin besojnë të mos shpall falimentimin. Nëse ka mungesë të produkteve nëpër vende ku do të duhej të ishin prezentë, klientët lajmërojnë personin përgjegjës në depo të kompanisë. Gjithashtu nëse produktet janë të vendosura jo mirë në rafte, klientët intervenojnë dhe ato produkte rregullohen siç do duhej të ishin.

c)  Në fushën e shitjeve të pajisjeve të IT-së, klientët e një biznesi në Spanjë kanë hapur grupe të ndryshme në rrjete sociale që të gjithë të hedhin ide dhe pastaj këto ide të modifikohen apo ndryshohen dhe në fund të aprovohen nga biznesi dhe të futen në implementim, vetëm që rënia e shitjeve të ngadalësohet për momentin.

d)  Në fushën e hotelerisë – klientët besnik kanë filluar të shkruajnë përvojat e tyre fantastike për një hotel dhe atë me të hyra vetanake ta printojnë si udhëzues turistikë në mënyrë që klientët e rinj potencial të kuptojnë pikërisht nga vetë klientët që kanë pasur rastin të qëndrojnë aty për gjëra të rëndësishme që kanë të bëjnë me sigurinë e ushqimit, pastërtinë dhe hapësirat e mëdha jashtë dhe brenda hotelit, gjë që sot si shkak i virusit Covid-19 ka shumë rëndësi, dhe prapë e tëra kjo bëhet si kthim i besimit të klientit.

Kjo është fuqia e klientit, ky është klienti i cili:

• Shpesh herë shpërfillet totalisht;
• Shpesh herë nuk dëgjohet dhe nuk kuptohet;
• Shpesh herë gënjehet;
• Shpesh herë nuk pyetet për të ndihmuar edhe pse në disa raste klienti mund të ketë njohuri më shumë se sa vetë kompania;
• Shpesh herë vërejtjet dhe sugjerimet e tij shkojnë në vesh të shurdhër;
• Shpesh herë fjala e tij nuk respektohet;
• Shpesh herë shihet thjeshtë si një mjet financiar dhe jo si një qenie njerëzore;
• Shpesh herë përballet me rritje çmimesh dhe prishje të cilësisë pikërisht në situata të rënda si kjo e pandemisë Covid-19;
• Shpesh herë pranon garanci false me shkronja të vogla të cilat mund të shihen vetëm me përdorimin e Llupës.

Pandemia do kaloj kurse klientët do ju mbajnë mend, për të mirë ose për të keq. Gjithçka çfarë mund të ketë funksionuar më parë, mund të mos funksionojë pasi të kalojë pandemia kështu që, këshilla e vetme për një pjesë të bizneseve në vendin tonë pas kalimit të kësaj situate është që, të krijohen programe të një afërsie më të madhe ndërmjet klientëve dhe kompanisë, të shpërthej kreativiteti në programe të kthimit të besimit të klientëve dhe këta klientë të jenë të përfshirë në më shumë gjëra çka biznesi bënë.