Ministri i Kulturës, Rinisë dhe Sportit, Hajrulla Çeku, ka bërë me dije se pasi filluan punimet në restaurimin e gjimnazit të vjetër ‘Ismail Qemali’ në Ferizaj, sot në orët e para të mëngjesit iu vu flaka.

“Kontratën për restaurimin e gjimnazit të vjetër e patëm nënshkruar javën e kaluar. Dje kanë nisur punimet, ndërsa sot në orët e para të mëngjesit ia vunë flakën. Ky është krim. Përgjegjësit duhet të përballen me drejtësinë”, ka shkruar Çeku në “Facebook”.

Ai ka theksuar se gjimnazi i vjetër “Ismail Qemali” në Ferizaj do të restaurohet, i pëlqeu apo jo keqbërësve.

“Trashëgimia jonë kulturore është më e rëndësishme se interesat tuaja të ngushta. Metodat e porositë mafioze nuk na ndalin”, ka shkruar ministri Çeku.