Presidenti i Shqipërisë, Bajram Begaj ka filluar takimin me kryetarin e Partisë Demokratikë të Kosovës, Memli Krasniqi. Në takimin që po mbahet në Kuvendin e Kosovës, Krasniqi është i shoqëruar nga nënkryetarja e partisë Vlora Çitaku dhe deputetë të PDK-së.

Gjithashtu sot, presidenti i Shqipërisë pritet të takojë edhe kryetarin e Lidhjës Demokratike të Kosovës dhe atë të Aleancës për Ardhmërinë e Kosovës. Begaj do të ketë takim edhe me përfaqësues të partive jo minoritare dhe me komandantin e KFOR-it.

Vizita e Begajt në Kosovë ka nisur dje ku është pritur me nderime shtetërore nga presidentja e vendit Vjosa Osmani, kryeministri Albin Kurtin e Kryetari i Kuvendit Glauk Konjufca.

Gjatë qëndrimit në ditën e parë në Prishtinë presidenti i Shqipërisë ka deklaruar se të dy vendet ndajnë aspiratat e njejta drejt rruges evropiane. Ai ka thënë se Shqipëria e mbështet Kosovën drejt Bashkimit Evropian dhe NATO-s ndërsa ka theksuar se do të jetë zëri i Kosovës aty ku i jepet mundësia.