SALI BASHOTA

PRISHTINA NATËN E 31 MARSIT

Natë e fundit e dhembjes

Kush do ta ngulë mbi kokë gurvarrin

Seancë e gjumëharresës së neveritur

A u thahet poetëve fytyra a u ndryshkën fjalët

Duke i copëtuar vargjet e lidhura nga mallkimi

Korba korba korba fluturojnë mbi Kosovë

Asfalti i mbuluar me gjak gjurmët e ferrit ndrijnë

E nesërmja e plagosur si thikë vizëllon

Prishtina mbyllet në burg si ta shpëtojmë kokën

A jeni gjallë miqtë e mi po vjen treni i vdekjes

Gjaku rrjedh do të krimbemi morrat do të na hanë

Ku do t’i varrosim thinjat e flokëve

Thonjtë e gishtave vajin e fëmijëve

Pëshpëritjet e fundit se na plasi zemra

Refugjatë të nëmur që barrën e lirisë e bartin në shpinë

Duke pritur arkivolin pa shqipshkrim

Të lagur në shiun e përgjakur të marsit

(1999)

POEZI E VRARË

digjej dhoma ime shtëpia prej guri biblioteka e shpirtit

dorëshkrimet e shpirtit librat e shpirtit të gjitha

mallkimet

muret e bardha vaji i Rozafës astma e tim ati trishtimi

im

makina e ndryshkur e shkrimit çanta e vjetër e

gjimnazit të Kijevës

shtrati i hekurt lulja e vyshkur

lapsat e ndryshkur të fëmijëve flokët e zbardhur të

nënës

pasqyra e zezë klithma e vëllait

pastaj fotografitë e grisura të gruas

lotët e fluturave dhe një nga ëndrrat më të bukura

më vonë parakalojnë tanket më vonë shtëpisë i del

tymi

pastaj vdesin zogjtë një nga një pastaj shkrumbohen

kujtimet pastaj

digjej dhoma ime shtëpia prej guri biblioteka e shpirtit

LOJA E TMERRIT

Grua mbuloma kokën me batanije

Fëmijët janë zverdhur nuk do t’i çelë mëngjesi

Shi i zi bie në kufirin e vdekjes

Bllaca gjëmon kur na i zhveshin edhe ndjenjat

Ç’trishtim i tmerrshëm këput litarët e lotëve

Populli im midis dy grumbuj gjarpërinjsh këlthet

Po vdes në shkretëtirën e atdheut të vet

O Zot jam njeri i shndërruan në numër

Kur loja e tmerrit vazhdon pa pikë pa presje

(2 prill 1999)

(Këto poezi janë botuar në sprovën për antologji “Dritë mbi plagë”, botuar nga Qendra “Gjenocidi në Kosovë – Plagë e Hapur”, Gjenevë, 2020. Në ditët në vijim, duke nisur nga 13 nëntori, në gazetën “Epoka e re”, në portalin online të saj dhe në formatin Pdf po të saj, për çdo ditë do të botohen poezitë e autorëve të botuara në këtë përmbledhje)