Veprimtari i çështjes kombëtare dhe publicisti Riza Greiçevci, ka sjellë para lexuesve librin e tij më të ri me titull: “Faleminderit NATO”, një vepër që trajton luftën çlirimtare të Kosovës, ndërhyrjen e NATO-s dhe zhvillimet që lidhen me procesin gjyqësor ndaj ish-krerëve të UÇK-së në Hagë.

Libri i kushtohet UÇK-së, NATO-s, ish-presidentit të Kosovës Hashim Thaçi, si dhe luftëtarëve të lirisë që aktualisht po përballen me proces gjyqësor në Hagë.

Sipas autorit, “Faleminderit NATO” paraqet një vlerësim për rolin vendimtar që aleanca veriatlantike pati në ndalimin e luftës në Kosovë dhe në krijimin e kushteve për liri e paqe. Në të njëjtën kohë, libri sjell reflektime dhe poezi mbi sakrificën e luftëtarëve të UÇK-së.

Me këtë botim, Greiçevci vazhdon angazhimin e tij të gjatë publicistik për dokumentimin e luftës së Kosovës dhe çështjeve që lidhen me të. Ai ka publikuar 10 libra para fillimit të procesit gjyqësor ndaj liderëve të UÇK-së në Hagë dhe edhe 15 libra të tjerë që nga nisja e këtij procesi, duke e çuar në 25 numrin e veprave publicistike kushtuar UÇK-së dhe gjykimit në Hagë.

Në tërësi, Riza Greiçevci numëron 137 vepra të botuara në fusha të ndryshme, duke u renditur ndër autorët më produktivë në publicistikën shqiptare që trajton çështjen kombëtare, luftën çlirimtare dhe zhvillimet historike e politike të Kosovës.

Libri “Faleminderit NATO” vjen si një dëshmi e re e këtij përkushtimi, duke synuar të ruajë në kujtesën kolektive kontributin e NATO-s, të UÇK-së dhe të të gjithë atyre që, sipas autorit, sakrifikuan për lirinë e Kosovës.