Në Kuvendin e Kosovës ka dështuar votimi i Projektligjit për pagën minimale, jashtë së cilës kanë mbetur veteranët e UÇK-së.

Pas dështimit të këtij projektligji, protestuesve jashtë ndërtesës së Kuvendit i janë bashkuar edhe deputetët e PDK-së.

Shefi i këtyre deputetëve, Abelard Tahiri, ka thënë se nuk do të lejojnë të kalojë një ligj i tillë.

“Kjo qeveri e turpit po tenton ta kalojë projektligjin për pagat minimale që diskriminon kategorinë që e mundësoi lirinë e Kosovës”, ka thënë ai.

Ndërsa ushtruesi i detyrës së kryetarit të OVLUÇK-së, Faton Klinaku, ka thënë se ky projektligj nuk duhet të miratohet sepse veteranët e UÇK-së duhet të jetojnë me dinjitet.

“Ky ligj nuk duhet të miratohet sepse veteranët e UÇK-së duhet të jetojnë me dinjitet. Ne kërkojmë që të rritet paga minimale për punëtorët, por veteranët nuk duam të preken sepse edhe veterani ka familje”, ka thënë Klinaku.