Ministri i Integrimit Evropian (MIE), Blerim Reka, ka reaguar për herë të parë pas kërkesës së opozitës për dorëheqjes se tij në lidhje me idenë e tij që Serbisë t’i lejohet dalja tranzit në Adriatik në këmbim të ulëses së Kosovës në OKB.

“Natyrisht, unë mbroj qëndrimin e kryeministrit Kurti për reciprocitet me Serbinë si parim i marrëdhënieve dhe marrëveshjeve tona të ardhshme. Gjithçka tjetër vjen në shprehje vetëm më vonë, vetëm më pas. Më duket e pandershme qe ata të cilët nuk e kërkuan dorëheqjen e presidentit aktual teksa negocionte zgjidhje territoriale me shkëmbime sekrete, të kërkojnë tash dorëheqjen time”, ka shkruar Reka në llogarinë e vet në “Facebook”.

Postimi i plotë i Rekës:

Të nderuar qytetarë,

Këto ditë pati kritika nga opozita në lidhje me një fjali timen në intervistën televizive në emisionin “Jeta në Kosovë”. Ishte e nxjerrë nga konteksti dhe vetëm pjesa e dytë e përgjigjes në pyetjen: “A do t’i kërkohet Kosovës me marrëveshjen e Uashingtonit, t’i japim territor Serbisë”?

Pas përgjigjes sime se nuk mund të përgjigjem në pyetje hipotetike, por assesi askush nuk guxon të jap territor për ulësen në OKB, sepse integriteti territorial është i panegociueshëm; në insistimin e gazetares se çka atëherë mund të japim për atë ulëse në OKB, thashë ndoshta si ide eventuale qe t’i lejojmë Serbisë kalimin tranzit nëpër autostradën tonë për detin Adriatik.

Pra, diçka që edhe deri tash i është lejuar Serbisë dhe që është ngritur si ide edhe në kuadër të Procesit të Berlinit që nga viti 2014. Kjo është e tëra, as nuk është vendim, as qëndrim i qeverisë, por një mendim i imi personal dhënë në pyetjen konkrete për një çështje konkrete. Asgjë më tepër.

Natyrisht, unë mbroj qëndrimin e kryeministrit Kurti për reciprocitet me Serbinë si parim i marrëdhënieve dhe marrëveshjeve tona të ardhshme. Gjithçka tjetër vjen në shprehje vetëm më vonë, vetëm më pas.

Më duket e pandershme qe ata të cilët nuk e kërkuan dorëheqjen e presidentit aktual teksa negocionte zgjidhje territoriale me shkëmbime sekrete, të kërkojnë tash dorëheqjen time.

/Epoka e re/