Një aksident tragjik ajror është regjistruar në provincën Malatya, në lindje të Turqisë, ku një helikopter ushtarak i modelit S-70 është rrëzuar, duke u marrë jetën katër pjesëtarëve të personelit ushtarak.

Lajmi është konfirmuar nga Ministria e Mbrojtjes Kombëtare e Turqisë, e cila bëri të ditur se shkaku i rrëzimit mbetet ende i paqartë.

Sipas autoriteteve, menjëherë pas marrjes së informacionit për incidentin janë angazhuar ekipet përkatëse, të cilat kanë nisur operacionet e kërkim-shpëtimit. Më pas u konfirmua edhe gjetja e rrënojave të helikopterit.

Deri në këto momente, autoritetet turke nuk kanë dhënë informacione të tjera mbi rrethanat e aksidentit, ndërsa pritet të zbardhen shkaqet që çuan në rrëzimin e mjetit ajror.