ShBA-ja ndërprenë 1 miliard dollarë për ndihma në Pakistan

05 janar 17:41

Qeveria amerikane ka thënë se do të ndërpresë ndihmën për siguri në ushtrinë pakistaneze në vlerë të 1 miliard dollarëve, derisa të merret “hapi vendimtar” kundër talibanëve afgane dhe rrjetit Haqqani, të cilët veprojnë brenda kufijve të Pakistanit.

Vendimi është njoftuar nga zëdhënësja e Departamentit të Shtetit, Heather Nauert.

“Talibanët dhe rrjeti Haqqani vazhdojnë të gjejnë strehim brenda Pakistanit derisa destabilizojnë Afganistanin dhe sulmojnë personelin amerikan dhe atë të aleatëve”, ka thënë Nauert.

“Derisa qeveria e Pakistanit të marrë hapin vendimtar kundër talibanëve afganë dhe grupit Haqqani, Shtetet e Bashkuara do të ndërprenë atë lloj të ndihmës për siguri në Pakistan”, ka thënë ajo.

Sipas saj departamenti është duke punuar ende në detaje, mirëpo në këtë ndalim përfshihen rreth 900 milionë dollarë për operacionet kundërterrorizmit.

Shtëpia e Bardhë i ka bërë thirrje Pakistanit më 2 janar të bëjë më shumë në luftimin e terrorizmit dhe se do të njoftonte për “hapa specifik” brenda disa ditëve për t’i bërë presion Pakistanit.

Përmes një postimi në llogarinë e vet në “Twitter” më 1 janar, presidenti amerikan, Donald Trump ka kërcënuar me ndërprerjen e ndihmave në vlerë të miliarda dollarëve për Pakistanin, duke akuzuar Islamabadin për krijimin e strehave të sigurta të ekstremistëve që veprojnë në Afganistan, raporton “Rel”.

Më 4 janar, gjenerali i Pakistanit, Asif Ghafoor, i ka thënë televizionit Geo, se Islamabadi kërkon të vazhdojë bashkëpunimin me Shtetet e Bashkuara mirëpo “nuk do të bëjë kompromise ndaj interesave të shtetit dhe imazhit të tij”.

Ai ka thënë se Pakistani do të përgjigjet për çdo hap që merr qeveria amerikane kundër Pakistanit, pa dhënë më shumë detaje.

Lajme të sponsorizuara

Të fundit
Futbollisti Ledian Memushaj mund t’i bashkohet mesfushorit tjetër shqiptar, Migjen…