Një shofer është ndëshkuar nga Policia e Kosovës për tejkalim të shpejtësisë së lejuar në Ferizaj.

Sipas Policisë Rajonale të Ferizajt, rreth orës 05:00 të mëngjesit, njësia e Komunikacionit Rrugor ka ndaluar në rrugën magjistrale në fshatin Prelez i Muhaxherëve një automjet të tipit BMW 318 me targa të huaja.

Gjatë kontrollit është konstatuar se shoferi, H.S., 37 vjeç, po lëvizte me shpejtësi prej 111 km/h në një zonë ku kufizimi i lejuar është 50 km/h.

Shkelja është evidentuar me radar laserik.

Për këtë kundërvajtje, policia i ka shqiptuar shoferit gjobë prej 300 eurosh, 3 pikë negative dhe masën mbrojtëse të ndalimit të drejtimit të automjetit për një periudhë prej tre muajsh.

Policia Rajonale e Ferizajt ka bërë të ditur se do të vazhdojë kontrollet dhe aktivitetet e intensifikuara në trafik, me synim rritjen e sigurisë rrugore dhe respektimin e rregullave të komunikacionit.