Sot në emisionin “Për ditë të mbarë”, të RTV21, me drejtoreshën e Shoqatës Shqiptare të Turizmit, Matilda Naçon dhe me drejtorin e Organizatës Turistike në Ulqin, Fatmir Gjekën, u diskutua për sezonin e sivjetmë veror. Matilda Naço tha se shpreson të ketë sezone turistike në Shqipëri dhe që deri më 1 qershor gjendja të ndryshojë pozitivisht, por që u shpreh se nuk kanë diçka zyrtarisht të shpallur.  E Fatmir Gjeka deklaroi se Ulqini është gati që qysh nesër t’i presë mysafirët e parë, por që shtoi se nuk varet vetëm nga ata, por edhe nga gjendja e vendeve të regjionit.

Sa iu përket çmimeve gjatë sezonit turistik në Shqipëri, drejtoresha e Shoqatës Shqiptare të Turizmit u shpreh që nuk do të ketë rritje të çmimeve, ndërsa theksoi se ulja e çmimeve ecën me tregun. Ndërkaq, drejtori i Organizatës Turistike në Ulqin deklaroi se Ulqini nuk ka konkurrencë sa i përket asaj që ofron, duke përfshirë edhe çmimet. Sipas Gjekës, çmimet në Ulqin janë mjaft të ulëta. Ai shtoi se me siguri në Ulqin do të ketë ulje të çmimeve.