Sokoli: Lokacioni i stadiumit kombëtar s’duhet të ndërrohet

22 nëntor 23:02

Ditëve të fundit është bërë bujë e madhe sa i përket lokacionit të ndërtimit të stadiumit kombëtar të Kosovës, pasi zyrtari i lartë i LDK-së, Lumir Abdixhiku ka thënë se ekziston një marrëveshje brenda partisë që stadiumi të zhvendoset nga qyteti i Drenasit në afërsi të Prishtinës, Bërrnicë.

Sa i përket kësaj çështje për KosovaPress ka folur edhe trajneri i mirënjohur kosovar, Bylbyl Sokoli.

Sokoli tha se para një viti e ka dhënë idenë e tij rreth stadiumit kombëtar. Sipas tij që nga ajo kohë Kosova është dashur t’i ketë dy stadiume për ndeshje ndërkombëtare.

“Para një viti kam fol për stadiumin e ri qe do të ndërtohet. Kam thënë se Kosova duhet t’i rregullojë dhe mirëmbajë dy stadiume për ndeshjet ndërkombëtare, ‘Adem Jasharin’ në Mitrovicë dhe ‘Fadil Vokrrin’ në Prishtinë. Kostoja e ndërtimit dhe të mirëmbajtjes së stadiumit të ri është shumë e lart prandaj më mirë të ndërtohen 7-8 stadiume me nga 5-6 ulëse nëpër qendrat e Kosovës”, tha Sokoli.

Ndërkohë që sa i përket lokacionit të stadiumit, Sokoli u shpreh se nuk është e nevojshme të ndërrohet lokacioni për shkaqe politike, pasi që vendi ku është caktuar i plotëson të gjitha kriteret.

“Nëse është vendosur të ndërtohet stadiumi i ri atëherë nuk duhet të ndërrohet lokacioni për shkaqe politike. Vendi ku është vendos i plotëson të gjitha kriteret e nevojshme për një stadium kombëtar ku do të zhvilloheshin ndeshjet ndërkombëtare”, përfundoi Sokoli. Kujtojmë që për këtë çështje ka reaguar edhe Ministria për Kulturë, Rini dhe Sport ditë më parë.

Fjalët Kyçe:

Lajme të sponsorizuara

Të fundit
Sali Bislimi Kombi shqiptar mund të bashkohet dhe ndërtohet vetëm…