Tahiri: Vendi mund të shkojë në zgjedhje në fund të janarit ose në shkurt

06 dhjetor 14:56

Vështirë e arritshme është duke u konsideruar një marrëveshje politike për zgjedhjen e presidentit të Kosovës.

Njohësit politikë kanë vlerësuar se çdo variant, pavarësisht tentimeve, vendi do të shkojë në zgjedhje të reja. Madje, paralajmërimet e fundit të koalicionit qeverisës për t’i dhënë zgjidhje kësaj çështje i kanë quajtur pazar e tregti.

Allen Meta nga “D4D”, ka thënë se i pari i shtetit duhet të jetë unifikues dhe i pajtueshëm për të gjithë, e jo të zgjidhet nga pazaret politike.

“Partitë politike kohën e fundit janë duke e parë pozitën dhe institucionin si pazar e tregti. Këto nuk duhet të realisht të ndodhin në institucionet e Kosovës, pasi janë të dëmshme. Që nga ngjarja e emërimeve politike të ndryshime deri më tani, e sidomos tek çështja e presidentit. Ne besojmë se është shumë e rëndësishme të mos ketë tregti e biznes ndërmjet partive politike për çështjen e presidentit. Pasi ai duhet të jetë unifikues dhe i pajtueshëm për të gjitha partitë politike, jo vetëm për partnerët e koalicionit. Duke marrë parasysh se mandati i tij është pesë vjeçar dhe si i tillë besojmë se presidenti duhet t’i përfaqësojë të gjitha partitë politike dhe gjitha qytetarët. Besojmë se në këto konstilacionet e fundit që po ndodhin, sidomos nga partitë e koalicionit mund të jenë të dëmshme”, ka thënë Meta për “Kosovapress”.

Të pamundshme zgjedhjen e presidentit në këto rrethana politike, është duke e parë edhe analisti politik, Ramush Tahiri. Madje, ai ka dhënë edhe datat se kur vendi mund të shkojë në zgjedhje të reja.

“Nëse arrihet marrëveshja që me u bashkëngjitë qeverisë PDK-ja, atëherë gjasat janë që AAK të del nga koalicioni. Prapë nuk mund të zgjedhet presidenti sepse AAK-ja dhe LV-ja janë më shumë se 40 deputetë, që donë të thotë se në sallë nuk mund të jetë 80 deputetë. Pra në çdo variant, ani pse po shtyhet procedura, vendi do të shkojë në zgjedhje. Çdo variant, ose që jep dorëheqje qeveria dhe caktohen 45 ditë zgjedhjet, ose e shpërndanë vetë Kuvendi dhe shkohet në zgjedhje. Zgjedhjet mund të jetë në Kosovë, në shkurt, ose në fund të janarit. Por nuk mund të shtyhen më vonë, nuk ka arsye. Pasi për momentin po thuhet se arsye për zgjedhje është presidenti, por në të njëjtën kohë kemi një qeveri që nuk i ka 61 vota, por i ka 59 dhe një qeveri që nuk po mund të miratojë ligjet dhe vendimet e rëndësishme. Si qeveri e tillë nuk shihet ndonjë dobi për Kosovën nëse qeveria Hoti rrinë pushtet, nuk mund të kryejë punët për të cilat është zgjedhë dhe e ka mandatin”, ka thënë ai.

Ndërsa drejtori ekzekutiv i “Çohu”, Arton Demhasaj, e ka konsideruar të mundshme edhe rokadën politike, ku PDK-ja mund ta merr kryeministrin, ndërsa LDK-ja presidencën.

Por, rol kyç në këtë mes e sheh AAK-në, pa të cilën ka thënë se nuk do të ketë asnjë zgjidhje.

“Ka informacione dhe ka diskutime që janë zhvilluar ndërmjet LDK-së dhe PDK-së dhe akterëve tjerë politikë për një rokadë ndryshe. Aty flitet në një mënyrë që qeveria të kalojë në duart të PDK-së me kusht që LDK-ja të merr udhëheqjen me presidencë. Për këtë është përmend vet emri i kryetarit të LDK-së, Isa Mustafa, që ai të bëhet president, e dikush nga PDK të merr qeverinë. Ka pasur diskutime të tilla, këto janë zhvillu edhe sa kanë qenë ish presidenti Thaçi dhe Veseli këtu”, ka thënë Demhasaj.

Për zgjedhjen e një presidenti, partive parlamentare i kanë mbetur edhe 5 muaj si afat kushtetues. Derisa nuk ka një zgjidhje, ushtruese detyre e presidentit të vendit është Vjosa Osmani.

Lajme të sponsorizuara

Të fundit
Kylian Mbappe, ka hyrë në histori të Paris Saint Germain.…