Shefi i Grupit Parlamentar të AAK-së, Besnik Tahiri, ka bërë me dije se në mbledhjen e Kryesisë së Kuvendit, e cila u mbajt të hënën, u trajtuan agjendat dhe temat që janë protokollare dhe administrative, por, sipas tij, nuk u trajtuan temat që janë jetike dhe për të cilat do të duhej një reagim i kësaj qeverie.

Ai ka thënë se të mërkurën është 14 shkurti. “Po në këtë datë të vitit 2021, LV-ja i fitoi zgjedhjet. Ndërkaq, të enjten, hyjmë në vitin e katërt të kësaj qeverie. Aleanca për Ardhmërinë e Kosovës do të ngre tema jetike përmes tri iniciativave: Sigurimet shëndetësore, Ligji i Pagave në sektorin publik dhe Paga minimale në sektorin privat”, ka thënë Tahiri.

Duke folur për sigurimet shëndetësore, Tahiri ka thënë se si grup parlamentar kanë mbledhur nënshkrimet për thirrjen e një seance të jashtëzakonshme për Ligjin për Sigurimet Shëndetësore.

“Nëse i sëmuret dikujt, fëmija, prindi apo një anëtar i familjes, të gjitha kursimet që i ka, duhet t’i shkrijë, të hyjë borxh për të shëruar të sëmurin. Po hyjmë në vitin e katërt të qeverisjes dhe nuk janë në gjendje ta bien në Kuvend Ligjin për Sigurime Shëndetësore! Kjo do të jetë çështja që do të punojmë dhe të krijojmë një konsensus ndërpartiak. Si AAK kemi votuar shumë ligje dhe marrëveshje ndërkombëtare dhe mendojmë që është jetike për qytetarin e Kosovës që sigurimi shëndetësor të kalojë në këtë legjislaturë dhe të fillojë zbatimi i tij”, ka thënë ai.

Ndërkaq sa i përket Ligjit të Pagave në sektorin publik, ai ka thënë se me ketë ligj nuk përcaktohet vlera koeficientit, respektivisht paga e një zyrtari publik, por vetëm hierarkia.

“Ne do të punojmë që përmes amandamentimit të këtij ligji t’i bëjmë dy intervenime: të rirregullojmë hierarkinë e pagës dhe të përcaktojmë vlerën e koeficientit. Në sektorin publik paga mesatare duhet të jetë 1000 mijë euro, ndërkaq paga më e ulët nuk duhet të jetë nënë 450 euro”, është shprehur ai.

Sa i përket pagës minimale në sektorin privat, shefi i Grupit Parlamentar të AAK-së, Besnik Tahiri, ka theksuar se AAK-ja e ka dërguar në Gjykatën Kushtetuese trajtimin e çështjes së Ligjit për Pagën Minimale në sektorin privat.

Sipas tij, pas përfundimit të kësaj nga ana e kushtetueses, do të fillojnë me amandamentimin e Ligjit për Pagën Minimale.

“Në seancën e fundit kam folur për suficitin buxhetor të kësaj qeverie që ka arritur në 1 miliard e 125 milionë euro. Pra, jemi duke folur për një qeveri të paaftë, e cila për t’i mbuluar dështime e veta kardinalë në jetën qytetare, bënë eksperimente të cilat e kanë pru Kosovën me sanksione të BE-së dhe marrëdhëniet më të ulëta më bashkësinë ndërkombëtare”, është shprehur Tahiri.

Në interesimin e mediave lidhur me provokimet e shtetit të Serbisë, Tahiri ka thënë se agjenda armiqësore e Qeverisë së Serbisë ndaj Kosovës nuk do të ndalet.

“Pra, synimi i tyre është destabilizimi i Kosovës. AAK-ja i ka qëndrimet në këtë temë: sundimi i ligjit, shtrirja e sovranitetit dhe mbrojtja e integritetit territorial është detyrë e Qeverisë së Kosovës. Dhe, ne si Aleancë e japim mbështetjen e plotë në çfarëdo veprimi që është në këtë funksion. Se a do të kthehet ndonjëherë ushtria serbe në Kosovë, kjo është një ëndërr të cilën e ëndërrojnë nacionalistët në Serbi. Vuçiqi e di shumë mirë që ushtria serbe nuk do të kthehet kurrë më në Kosovë, dhe sikurse i ka dalë zot Kosovës Ushtria Çlirimtare e Kosovës më 1998/99 do t’i dalë zot Ushtria e Kosovës. Ata guximin e kanë vetëm të provokojnë, ndërsa qeveria jonë të bëjë reagime shtetërore por jo populiste”, ka deklaruar Tahiri.

Ndërkaq, lidhur me raportimin për kërcënimin ndaj kryeministrit Kurti, Tahiri ka theksuar se informacionet e hershme, apo paralajmërimi i hershëm ndodhë ndërmjet dy institucioneve: institucioneve të inteligjencës së Kosovës dhe vendit mik Maqedonisë së Veriut.

Sipas tij, ky komunikim është konfidencial, sekret e jo publik.

“Se cili ka qenë nivel i kërcënimit, atë nuk e dimë, veç se një shtet siç është Maqedonia e Veriut nuk guxon të bëjë deklarim publik, në qoftë se ekziston një komunikim zyrtar në mes dy institucioneve të inteligjencës të vendeve raport me këtë temë. Nuk mund ta pohoj dhe as ta mohoj sepse nuk kam informacion. As unë nuk jam ndier mirë kur e kam lexuar lajmin se është kërcënuar kryeministri Kurti. Por, më vjen keq dhe nuk ndihna mirë, kur një shtet detyrohet të demantojë për një çështje, e cila siç po shihet, është përdorur për synime politike. Ajo çka ka ndodhur atë ditë, Qeveria e Maqedonisë së Veriut e ka demantuar, ndërsa Qeveria jonë nuk është deklaruar”, ka thënë Tahiri.