Këngëtarja Era Istrefi, e cila të dielën ka performuar në finalen e Kupës së Botës në futboll, është nderuar me Medaljen Presidenciale Jubilare të Dhjetëvjetorit të Pavarësisë.

Ishte presidenti Hashim Thaçi që ia dhuroi këtë medalje Istrefit, e cila e konsideroi këtë nderim si një motivim shtesë që të vazhdojë ta promovojë vendin ku është lindur dhe rritur.

“Kjo medalje më motivon edhe më shumë që ta promovoj Kosovën sa më shumë që të mundem në të ardhmen. Faleminderit zotëri president, Hashim Thaçit, për medaljen. Ndjehem mëse e nderuar që kjo vjen prej vendit tim, prej Kosovës në të cilën jam rritur. Për mua është një ekstra motivim për të ardhmen që të punoj edhe më shumë. Jemi një vend me një popull tepër bujar dhe shumë të mirë”, ka thënë Era Istrefi.