Presidenti i Shteteve të Bashkuara të Amerikës (ShBA), Donald Trump, ka pritur tre të burgosurit amerikanë, që janë liruar nga Koreja e Veriut.

Trumpi ka thënë se “është një natë e veçantë për këta njerëz vërtet të mirë”, pasi ata arritën në bazën ajrore Andrews pranë Uashingtonit.

Shtëpia e Bardhë ka theksuar se lirimi i treshes është një gjest i vullnetit të mirë, përpara takimit të planifikuar midis Trumpit dhe udhëheqësit verikoreanë, Kim Jong-un.

Trumpi ka thënë se vendi i takimit do të shpallet “brenda tre ditësh”.

Donald Trump dhe Kim Jong Un kanë shkëmbyer deklarata të ashpra kundër njëri-tjetrit në të kaluarën, për shkak të programit bërthamor të Koresë Veriore.