Presidenti serb Aleksandar Vuçiç i ka dorëzuar një letër urimi Aleksandar Boçan-Kharchenko, ambasadorit të Rusisë në Beograd për fitoren autokratike të Vladimir Putinit në zgjedhje.

Në letrën e Vuçiç përmendet edhe Kosova, ku presidenti serb pretendon se serbët e Kosovës janë në “gjendje të vështirë”.

Mediat serbe citojnë një postim të Vuçiçit në faqen e presidences serbe në “Instagram” që jep detaje nga letra që i ka dorëzuar Putinit. Aty Vuçiç thotë se e falënderon Rusinë për “mbështetjen e integritetit territorial të Serbisë”.

“Shfrytëzova bisedën me ambasadorin Boçan-Kharchenko për t’i dorëzuar atij një letër për Presidentin e Federatës Ruse, Putin, në të cilën, përveç urimit për fitoren zgjedhore, i shpjegova edhe peshën e situatës me të cilën po përballet populli serb në Kosovë, sfidat e rëndësishme politike me të cilat përballet Serbia, me falënderim Federatën Ruse për mbështetjen që i jep integritetit territorial të Serbisë”, citohet të ketë thënë Vuçiç.

Putini shpalli fitoren autokratike në zgjedhjet në Rusi, ku fitoi 87.28 për qind të votave.