Zyrtari i Lëvizjes Vetëvendosje, Arbër Zaimi, i është kundërpërgjigjur sekretarit të përgjithshëm të Lidhjes Demokratike të Kosovës (LDK), Arban Abrashit, rreth hapjes së kufirit me Shqipërinë.

Abrashi  në llogarinë e vet në “Facebook” ka shkruar se është e pakuptimtë që Kosova të mos e hapë kufirin për Shqipërinë, kur kjo e fundit ka vendosur që kufirin me Kosovën do e hapë nesër (1 qershor).

Mes tjerash Abrashi ka thënë se çuditërisht avokuesit e bashkimit kombëtar janë larguar me Shqipërinë dhe janë afruar me fqinjët tjerë.

“Meqë Shqipëria ka vendosur ta hapë kufirin për Kosovën prej të hënës (nesër), është e pakuptimtë që Kosova të mos e hapë kufirin për Shqipërinë. Për bashkëpunim ndërshtetëror dhe kombëtar, duhen veprime konkrete e jo propagandë populiste. Çuditërisht, avokuesit e bashkimit kombëtar janë largu me Shqipërinë, e janë afruar me fqinjët tjerë!”, ka shkruar Abrashi.

“Klan Kosova” ka kontaktuar me Arbër Zaimin, i cili ka deklaruar se LDK-ja s’mund t’ju jap ligjërata patriotizmi.

Zaimi ka treguar se sot pritet që Ministria e Shëndetësisë të jap një vendim për shfuqizimin e ndalimit të udhëtimeve për në Shqipëri.

“Sot pritet të procedohet nga Ministria e Shëndetësisë një vendim për shfuqizimin e disa kufizimeve, midis tyre dhe ajo për udhëtimet në Shqipëri”.

“Deklaratën e Arban Abrashit nuk e kam parë, dhe uroj të mos jetë shprehur kështu. Vendimet për vendosjen e masave kufizuese apo për lehtësimin dhe heqjen e tyre, nuk janë politike por janë te udhëhequra nga parimet e shkencës mjekësore dhe epidemiologeve të IKShPK-së”, ka thënë Zaimi.

Zaimi ka theksuar se kufijtë mes Kosovës e Shqipërisë do të hapen, por personat që bëjnë deklarata të tilla e kanë hallin se si ta mbulojnë reciprocitetin ekonomik e tregtar të vendosur me Serbinë.

“Fatmirësisht kufijtë mes Kosovës e Shqipërisë do të hapen, por fatkeqësisht ata që bëjnë deklarata të tilla e kanë hallin se si të mbulojnë reciprocitetin ekonomik e tregtar të vendosur në raport me Serbinë”.

“Nuk mund të japin ligjërata patriotizmi subjektet të cilët e rrëzuan qeverinë veç për shkak se nuk pranoi asnjëherë ta hiqte taksen para se të vendoste reciprocitetin me Serbinë”, ka thënë Zaimi.