Në një takim virtual të organizuar nga Forca e Diasporës (FeD) ambasadori amerikan dhe miku i shqiptarëve, William G. Walker, ka folur për domosdoshmërinë e unifikimit të diasporës shqiptare pa dallim nga cila pjesë e trojeve shqiptare e kanë prejardhjen.

Sipas Ambasadorit Walker deri më sot në Kosovë në veçanti është injoruar ekspertiza e diasporës, por jo edhe paratë.

“Sikur diaspora shqiptare të bashkohej, kjo do të kishte ndikim pozitiv edhe për trojet shqiptare, sepse profesionalizmi i mërgimtarëve do të merrej më seriozisht në vendimmarrje, e edhe në vendlindjet e reja ku jetojmë në vendet perëndimore, sepse do ta forconim influencën tonë politike e ekonomike në këto shtete perëndimore”.

“Forca e Diasporës, e ka përkrahjen time të plotë dhe i uroj shumë suksese në Kuvendin/Kongresin e 2 prillit”, ka thënë ambasadori Walker.

Duhet të theksohet së biseda përmes platformës “Zoom” është mbajtur në anglisht dhe shqip tërë kohën, si dhe kishte pjesëmarrës e simpatizantë të Forcës së Diasporës nga Evropa, Amerika, Kanadaja, Japonia dhe Afrika.

Në këtë takim kishte pjesëmarrës edhe nga Kosova dhe tërë trojet shqiptare.