Mbrojtja ajrore e Kuvajtit aktualisht po përballet me sulme armiqësore me raketa dhe dronë si rezultat i agresionit të lig iranian, shkroi ushtria kuvajtiane në platformën sociale X.

“Në përgjigje të krimeve të kryera nga Amerika kundër popullit iranian, sulme me raketa dhe dronë janë duke u zhvilluar në bazat amerikane në Kuvajt”, konfirmoi televizioni shtetëror iranian pak më vonë në të njëjtën platformë.

Të mërkurën, Garda Revolucionare e Iranit sulmoi disa baza në Lindjen e Mesme të përdorura nga ushtria amerikane, përfshirë një në Kuvajt. Forcat iraniane iu përgjigjën natës së dytë të bombardimeve amerikane që synonin Republikën Islamike brenda tre ditësh. Një total prej 19 personash u vranë në sulmet e së martës në mbrëmje në Iran, përfshirë katër në një dasmë.

Zëdhënësi i Ministrisë së Jashtme iraniane, Esmail Baghai, i dënoi sulmet si një “krim lufte”, duke u ankuar se “një ceremoni martese u bombardua brutalisht si pjesë e një përpjekjeje të dëshpëruar nga Shtetet e Bashkuara për të mbuluar dështimin e saj”.

I vendosur për t’u hakmarrë, Irani paralajmëroi Shtetet e Bashkuara se tani mund të presë një “strategji të re” që synon “shkatërrimin e themeleve” të armikut, pa specifikuar se çfarë do të përfshinte kjo strategji. Nga ana e tij,

Donald Trump paralajmëroi Teheranin të mërkurën se Shtetet e Bashkuara mbeten të gatshme të sulmojnë Iranin në çdo kohë. /rtk