Deputeti i PDK-së, Mërgim Lushtaku, ka akuzuar Lëvizjen Vetëvendosje se po e bllokon konstituimin e Kuvendit, pasi deputetët e saj nuk e votuan kandidaten e PDK-së për nënkryetare, Vlora Çitakun.

Lushtaku ka thënë se LV-ja po shkel Kushtetutën, ligjet dhe rregullat e Kuvendit, duke pretenduar se me veprimet e sotme e ka treguar “fytyrën e vërtetë”.

“Shkelës të vërtetë të Kushtetutës, ligjeve dhe rregullave të Kuvendit është pikërisht VV-ja. Dhe ne e dimë shumë mirë. Doli në sipërfaqe fytyra e tyre e vërtetë, sepse këta janë të njëjtit që kanë thënë se do ta bëjnë bashkimin kombëtar, dhe se nuk e kanë bërë, kanë thënë se do ta bëjnë 0 TVSh-në për produktet esenciale dhe nuk e kanë bërë”, ka deklaruar Lushtaku.

Ai ka thënë se tash po shihet se deri ku është e gatshme të shkojë Vetëvendosje për të qëndruar në pushtet.

“Tash po e shohim se çka është në gjendje të bëjë Vetëvendosje vetëm e vetëm që ta ruajë karrigen”, ka thënë Lushtaku për “Klan Kosova”.