Batmobile ikonike e përdorur në filmin “Batman Returns” të vitit 1992 do të dalë në ankand më 23 nëntor në Los Angeles dhe online.

Shtëpia e ankandeve Julien’s Auctions vlerëson se vetura mund të shitet për 5 deri në 7 milionë dollarë, duke pasur mundësi të vendosë një rekord të ri për një veturë të përdorur në film.

Bëhet fjalë për versionin “Hero Batmobile”, i cili është përdorur realisht në shumicën e skenave të drejtimit në film. Vetura është një Chevrolet Impala dhe është e pajisur me motor V8 Chevrolet dhe transmision automatik me tri shpejtësi.

Pas përfundimit të xhirimeve, Batmobile u shfaq në premierën e filmit dhe më vonë u ekspozua në Marconi Automotive Museum.

Rekordi aktual për një Batmobile mbahet nga modeli i përdorur në serialin televiziv të viteve ’60, i cili u shit për 4.2 milionë dollarë. Nëse modeli i “Batman Returns” arrin vlerësimin prej 7 milionë dollarësh, ky rekord mund të thyhet.

Në ankand do të ofrohen edhe kostume, rekuizita dhe materiale të tjera nga historia e Batmanit në kinema. Për shkak të përmasave dhe kostove të mirëmbajtjes, pritet që vetura të përfundojë në koleksionin e një koleksionisti ose institucioni.