Kryetari i komunës së Dragashit, Bexhet Xheladini, ka njoftuar për disa projekte infrastrukturore që janë duke u realizuar në lokalitete të ndryshme të kësaj komune.

Përmes një postimi në Facebook, Xheladini ka bërë me dije se punimet përfshijnë rehabilitimin dhe asfaltimin e rrugëve, ndërtimin e kanalizimeve dhe mureve mbrojtëse, ndërtimin e një ure, si dhe rehabilitimin e rrjetit të ujësjellësit.

“Punë konkrete, investime të dukshme në disa lokalitete të komunës sonë”, ka shkruar Xheladini.

Sipas tij, në Zaplluxhe po bëhet heqja e kubëzave, rehabilitimi dhe asfaltimi i rrugës te lagjja e Xhamisë.

Në Bresanë, ai ka njoftuar për kubëzimin, ndërtimin e një pjese të kanalizimit dhe mureve mbrojtëse.

Ndërkaq, në fshatin Kuk po ndërtohet një urë, ndërsa në Brod po rehabilitohet rrjeti i vjetër i ujësjellësit në qendër të fshatit.

“Këto janë disa projekte nga qindra të tjera që do të realizohen këtë vit në shumë fshatra dhe në qendrën komunale”, ka deklaruar Xheladini.