Federata Bullgare e Futbollit (BFS) po shqyrton mundësinë e afrimit të ish-trajnerit të Shqipërisë, por mediat bullgare japin versione të ndryshme për negociatat dhe shanset e tij për t’u emëruar.

Sylvinho rikthehet në qendër të vëmendjes së mediave ballkanike, këtë herë si një nga kandidatët për të marrë drejtimin e kombëtares bullgare. Federata Bullgare e Futbollit (BFS) është në kërkim të një trajneri të ri pas largimit të Aleksandër Dimitrovit, ndërsa emri i brazilianit po përmendet gjithnjë e më shumë në mediat vendase.

Sipas raportimeve të Match Telegraph, drejtuesit e futbollit bullgar janë të gatshëm t’i ofrojnë Sylvinhos një pagë prej 1 milion eurosh në vit, shifër që do të përbënte rekord për një trajner të kombëtares bullgare. Në këtë paketë financiare parashikohet të përfshihet edhe stafi teknik i tij.

Presidenti i federatës, Georgi Ivanov, pritet të diskutojë mundësinë e emërimit me trajnerin brazilian në Milano, pasi oferta të shqyrtohet nga Komiteti Ekzekutiv. Sipas të njëjtave raportime, synimi i BFS-së është që Sylvinho të marrë drejtimin e skuadrës kombëtare nga 1 janari.

Megjithatë, pengesa kryesore mbetet financiare. Gjatë periudhës së tij në krye të Shqipërisë, Sylvinho përfitonte rreth 1 milion euro në vit, ndërsa stafi i tij kishte një kosto shtesë prej rreth 500 mijë eurosh. Për një federatë me burime të kufizuara financiare, përballimi i një pakete të tillë nuk është një çështje e thjeshtë. Por pikërisht kur emri i brazilianit po fiton terren, mediat bullgare kundërshtojnë njëra-tjetrën.

Gazeta 24 Chasa, në një artikull të publikuar mëngjesin e 9 tetorit, pretendon se nuk ka gjasa që Sylvinho të marrë drejtimin e kombëtares dhe se emërimi i tij nuk është në rendin e ditës. Sipas saj, emri i ish-trajnerit të Shqipërisë është propozuar nga presidenti Ivanov, por kjo nuk do të thotë se ai është kandidati që do të zgjidhet.

Nga ana tjetër, raportimi i Match Telegraph, i publikuar më vonë po atë ditë, flet për një ofertë konkrete prej 1 milion eurosh në vit dhe për kontakte të pritshme mes palëve. Kjo mospërputhje lë të hapur pikëpyetjen nëse BFS-ja po negocion realisht me brazilianin apo nëse emri i tij është ende vetëm një nga alternativat në diskutim.

Në listën e kandidatëve të përmendur nga mediat bullgare janë edhe Aleksandar Janković dhe Eduard Iordănescu, ndërsa federata nuk ka konfirmuar zyrtarisht asnjë emërim. Sylvinho, i cili udhëhoqi Shqipërinë drejt kualifikimit në Euro 2024, mbetet kështu një nga emrat më të përfolur për stolin bullgar. Megjithatë, deri në një njoftim zyrtar, oferta e raportuar dhe mundësia e emërimit të tij duhen trajtuar si informacione mediatike, jo si një marrëveshje e përfunduar. (TCh)