Rreth 2.3 milionë raste të reja të kancerit në mbarë botën gjatë vitit 2024 mund të kenë qenë të lidhura me infeksione, shumë prej të cilave mund të parandalohen ose trajtohen, sipas një studimi të ri të publikuar në revistën shkencore The Lancet Oncology.

Sipas hulumtimit, infeksionet përbënin rreth 12 për qind të të gjitha diagnozave të reja të kancerit në nivel global, duke sugjeruar se një pjesë e konsiderueshme e këtyre rasteve mund të shmangeshin përmes vaksinimit, kontrolleve parandaluese dhe trajtimit në kohë.

Dy infeksione rezultuan veçanërisht të rëndësishme: Helicobacter pylori (H. pylori), bakter që lidhet kryesisht me kancerin e stomakut, dhe virusi i papillomës njerëzore (HPV), i cili lidhet veçanërisht me kancerin e qafës së mitrës.

Studiuesit vlerësojnë se këto dy infeksione, së bashku, ishin të lidhura me më shumë se 1.5 milionë raste të kancerit gjatë vitit 2024.

Gary Clifford, epidemiolog në Agjencinë Ndërkombëtare për Kërkime mbi Kancerin dhe autor kryesor i studimit, theksoi se ndërhyrjet parandaluese mund të bëhen shumë përpara se një infeksion të çojë në zhvillimin e kancerit.

Sipas tij, zbatimi i programeve efektive kërkon mbështetje politike dhe financiare, përfshirjen e publikut dhe komunikim më të mirë për rëndësinë e parandalimit.

Studimi nënvizon rëndësinë e vaksinimit kundër HPV-së, diagnostikimit dhe trajtimit të infeksioneve, si dhe programeve të kontrollit shëndetësor, të cilat mund të ndihmojnë në uljen e numrit të rasteve të kancerit të lidhura me infeksionet.