FIFA iu përgjigj kritikave për çmimet e larta të biletave për Kupën e Botës 2026 të martën duke prezantuar një kategori të re çmimesh prej 60 dollarësh që do të jetë në dispozicion për të gjitha 104 ndeshjet, përfshirë finalen.

Biletat nga kategoria e re e çmimeve “niveli i tifozëve” do t’u ndahen shoqatave kombëtare për ndeshjet individuale në të cilat do të luajnë ekipet e tyre. Shoqatat pritet t’i bëjnë biletat në dispozicion të “tifozëve besnikë që kanë një lidhje të ngushtë me ekipet e tyre kombëtare”, thuhet në deklaratën zyrtare.

Ky veprim vjen pasi tifozët u tronditën dhe u zemëruan nga çmimet që varionin nga 120 deri në 265 dollarë për ndeshjet e fazës së grupeve, ndërsa diapazoni i çmimeve për finalen, që do të luhet më 19 korrik në East Rutherford, New Jersey, është 4,185 deri në 8,680 dollarë.

Në krahasim, kur Shtetet e Bashkuara pritën Kupën e Botës në vitin 1994, çmimet e biletave varionin nga 25 deri në 475 dollarë. Në Kupën e fundit të Botës në vitin 2022 në Katar, çmimet varionin nga 70 dollarë deri në 1,600 dollarë, pasi dihej se cilat ekipe do të luanin në ndeshje të caktuara.

FIFA ka marrë më shumë se 20 milionë kërkesa për bileta gjatë asaj që e quan “fazë e shitjeve të rastësishme”, e cila filloi të enjten e kaluar, pasi konfirmoi orarin e ndeshjeve që do të luhen në Meksikë dhe Kanada, përveç ShBA-së.

Kjo fazë e shitjes zgjat deri më 13 janar, dhe ata që fitojnë të drejtën e blerjes do të njoftohen në shkurt, raporton “Hina”.