Hetimi i pesë vendeve perëndimore, që akuzon “shtetin rus” për helmimin dhe vrasjen e opozitarit Aleksej Navalny, nuk ka ndalur negociatat për arritjen e paqes në Ukrainë. Të martën, në Gjenevë të Zvicrës, rifillojnë bisedimet trepalëshe mes Moskës, Kievit dhe Uashingtonit.

Sekretari amerikan i Shtetit, Marco Rubio, deklaroi se nuk ka “asnjë arsye për të vënë në dyshim” apo “kontestuar” raportin mbi vdekjen e Navalny-t, por nuk dha detaje të tjera.

Nga ana tjetër, Rusia vazhdon t’u dërgojë sinjale Shteteve të Bashkuara. Zëvendësministri i Jashtëm rus, Mikhail Galuzin, pjesë e delegacionit rus në Gjenevë, ka hedhur sërish idenë e vendosjes së “një qeverisjeje të jashtme në Ukrainë nën mbikëqyrjen e OKB-së” pas përfundimit të luftës. Një propozim që, sipas tij, nuk është i ri dhe që ishte avancuar më herët edhe nga Vladimir Putin në mars të vitit 2025.

Sipas Galuzin, një zgjidhje e tillë do të mundësonte zhvillimin e zgjedhjeve demokratike në Ukrainë dhe ardhjen në pushtet të një qeverie legjitime, me të cilën Rusia mund të nënshkruajë një traktat të plotë paqeje dhe marrëveshje për bashkëpunim të ardhshëm.

Zgjedhjet presidenciale në Ukrainë janë një nga pikat më të ndjeshme të negociatave. Rusia kërkon zgjedhje të reja, duke argumentuar se mandati i presidentit ukrainas Volodymyr Zelensky ka përfunduar në maj 2024. Megjithatë, për shkak të ligjit ushtarak, në Ukrainë nuk është mbajtur votim i ri. Moska është shprehur e gatshme të ndalë sulmet në ditën e zgjedhjeve, por kjo nuk mjafton për Zelensky-n, i cili ka deklaruar se zgjedhjet mund të mbahen vetëm pas të paktën dy muajsh armëpushim.

Galuzin akuzoi gjithashtu Kievin se nuk ka reaguar ndaj propozimit rus për krijimin e “një qendre dypalëshe për monitorimin e armëpushimit” dhe grupeve të punës për çështje ushtarake, politike dhe humanitare. Ai kritikoi edhe Bashkimin Evropian, duke thënë se për shkak të “ngurtësisë ideologjike” dhe refuzimit të dialogut me Moskën, BE-ja “e ka përjashtuar veten nga tryeza e bisedimeve”.

Ndërkohë, Ukraina vijon betejën kundër korrupsionit. Hetuesit kanë njoftuar arrestimin e një ish-ministri të Energjisë, i përfshirë në një skandal korrupsioni prej rreth 100 milionë dollarësh, që ka vënë në vështirësi presidentin Zelensky. Sipas mediave, bëhet fjalë për German Galushchenko, ministër nga viti 2021 deri në 2025, i cili u arrestua teksa po udhëtonte me tren dhe po kalonte kufirin.

Zelensky, pasi u takua me Rubio në Mynih dhe zhvilloi biseda telefonike me të dërguarit amerikanë Steve Witkoff dhe Jared Kushner, të cilët do të jenë të pranishëm në Gjenevë, theksoi rëndësinë e përparimit në garancitë e sigurisë dhe rindërtimin ekonomik. Ai nuk kurseu as një koment ironik ndaj Putinit, duke theksuar diferencën e moshës: “Unë jam 48 vjeç, ai 73. Unë jam më i ri. Atij nuk i ka mbetur shumë kohë”, tha ai.